Тошкентда фирибгарлик йўли билан 1,7 млрд сўмни ўзлаштирган шахс қўлга олинди

Бош прокуратура шахсий хавфсизлик бошқармаси томонидан ўтказилган тезкор тадбирда ўзини прокуратура ходими сифатида таништириб келган шахс қўлга олинди.

Тергов маълумотларига кўра, А.А. исмли шахс фуқароларнинг ишончига кириб, арзон нархда буғдой харид қилиш ва уни қайта ишлаш орқали катта даромад олиш мумкинлигини айтган. Шу тариқа у икки фуқародан жами 1,7 млрд сўм маблағни фирибгарлик йўли билан қўлга киритганликда гумонланмоқда.

Шунингдек, у тадбиркорга Тошкент шаҳри Яккасарой туманидаги 50 сотих ер майдони бўйича бекор қилинган қарорни қайта тиклаб беришни ваъда қилиб, 95 минг АҚШ долларини олгани айтилмоқда.

Тергов материалларига кўра, гумонланувчи ижтимоий тармоқлар орқали ҳам фуқаролар билан алоқа ўрнатган. У прокуратурада ишлашини айтган ҳолда фуқаронинг Cobalt автомобилини янги Gentra машинасига алмаштириб беришни ваъда қилган. Автомобилни қўлга киритгач, уни бошқа шахсга сотиб юборган ва маблағни шахсий эҳтиёжлари учун ишлатган.

Бош прокуратура маълум қилишича, гумонланувчи яна бир фуқаро билан яқин муносабат ўрнатиб, унинг уй калити нусхасини қўлга киритган. Кейинчалик уй эгаси сафарда бўлган вақтда хонадонга кириб, қимматбаҳо тилла тақинчоқларни ўғирлаб кетган.

2026 йил 18 июн куни унга нисбатан Жиноят кодексининг фирибгарлик, ўғирлик ва бошқа моддалари билан айблов эълон қилинган. Суд қарори билан қамоқ эҳтиёт чораси қўлланилган.