Тошкентда Ўзбекистон капитал бозори бўйича VII халқаро конференция ўтказилди
06.09.2025 | 14:004 daqiqa
Пойтахтда Cbonds-Congress томонидан Истиқболли Лойиҳалар Миллий Агентлиги (ИЛМА) ва Инвестиция Институтлари Миллий Ассоциацияси (ИИМА) кўмагида "Ўзбекистон Республикаси капитал бозори" мавзусидаги VII халқаро конференция бўлиб ўтди.
Конференция мамлакат молия бозорини чуқур интеграция қилиш,халқаро тажриба алмашиш ва янги ислоҳотлар йўналишларини белгилаш учун муҳим майдонга айланди.
Конференция доирасида тартибга солувчи органлар,хорижий ва маҳаллий инвесторлар ҳамда эмитентлар иштирокида 2025 йилдаги асосий ўзгаришлар,фонд бозори динамикаси ва либераллашув жараёнлари муҳокама қилинди. Иштирокчилар миллий компанияларнинг IPO ва SPO жараёнлари,халқаро жойлаштириш истиқболлари,шунингдек,исломий молия воситаларини жорий этиш ҳамда финтех соҳасидаги янги имкониятларга алоҳида эътибор қаратдилар.
ИЛМА директорининг биринчи ўринбосари Вячеслав Пак очилиш нутқида капитал бозорини янги босқичга олиб чиқиш учун туб ислоҳотлар зарурлигини таъкидлади. Унинг сўзларига кўра,рақамлаштириш,дастурий таъминот ва инфратузилма билан боғлиқ муаммоларга тезкор жавоб топиш,шунингдек,хусусийлаштириш жараёнларини жадаллаштириш иқтисодиёт учун стратегик вазифа ҳисобланади.
"Эмитентлар инвесторларни эндиликда кредитлар орқали эмас,балки акциялар чиқариш ва IPO орқали жалб қилишдан манфаатдор бўлишлари лозим", деди Пак.Шунингдек,у корпоратив облигациялар бозоридаги ижобий ўсишни алоҳида қайд этди ва бу йўналиш мамлакат молия бозорининг тўғри йўлдан кетаётганидан далолат беришини таъкидлади. Тадбирда давлат органлари,йирик банклар,инвестиция компаниялари ва брокерлик уйларини ҳамда халқаро молия институтларини ўз ичига олган 250 дан ортиқ вакил иштирок етди. Экспертлар фикрига кўра,конференцияда илгари сурилган ташаббуслар Ўзбекистон капитал бозорини модернизация қилиш,уни жозибадор ва халқаро стандартларга мос тизимга айлантиришда муҳим роль ўйнайди.
