Трамп: Эрон раҳбарлари музокара қилмоқчи

АҚШ президенти Доналд Трамп Эрон раҳбарияти Вашингтон билан музокаралар ўтказиш истаги билан боғланганини маълум қилди. Унинг айтишича, алоқа ўрнатилган ва эҳтимолий учрашувни ташкил этиш масаласи муҳокама қилинмоқда. Бу баёнот 11 январ куни Air Force One самолёти бортида журналистлар билан суҳбатда билдирилди.

Трампнинг сўзларига кўра, Эрон етакчилари бевосита қўнғироқ қилиб, музокараларга тайёр эканини билдирган. Шу билан бирга, АҚШ президенти учрашувдан олдин муайян ҳаракатлар қилиниши мумкинлигини ҳам истисно этмади, аммо батафсил маълумот бермади. Расмий Теҳрон томони ҳозирча ушбу баёнотга муносабат билдирмади.

АҚШ раҳбари аввалроқ Оқ уй ва ҳарбий тузилмалар Эрондаги оммавий норозилик намойишлари шароитида эҳтимолий ҳаракат сценарийларини ўрганаётганини айтган эди. У ҳарбийлар вазиятни таҳлил қилаётганини, бир нечта жиддий вариантлар кўриб чиқилаётганини таъкидлаб, Эрон мухолифати вакиллари билан ҳам алоқада эканини билдирган.

АҚШда жойлашган HRANA инсон ҳуқуқлари ташкилоти маълумотларига кўра, сўнгги ҳафталарда давом этаётган тартибсизликлар вақтида 500 дан ортиқ киши ҳалок бўлган, 10 мингдан зиёд одам ҳибсга олинган. Бу рақамлар вазиятнинг кескинлигини кўрсатади.

Норозилик акциялари Эронда 2025 йил 28 декабрда бошланган. Аввалига иқтисодий аҳвол ёмонлашувига қарши чиққан тадбиркорлар савдо нуқталарини ёпган, кейинчалик намойишлар йирик шаҳарларга ёйилган. Қисқа фурсат ичида акциялар сиёсий тус олиб, айрим иштирокчилар олий раҳбар Али Хоманаийга қарши шиорлар айта бошлади ва ҳокимият алмашинувини, жумладан, Ризо Паҳлавийнинг қайтишини талаб қилди.

Иқтисодий жиҳатдан Эрон 40 фоиз атрофидаги инфляция ва Ғарб санкциялари босими остида қолмоқда. 2 январь куни Трамп «Truth Social» тармоғида тинч намойишчиларга қарши куч ишлатилса, АҚШ аралашиши мумкинлигидан огоҳлантирган эди. Кейинчалик эса айрим намойишлар тартибсизликка айланиб, банклар ва давлат идораларига ўт қўйилгани ҳақида хабарлар тарқалди.