Трамп Эронда қатллар тўхтатилганини хабар қилди
Унга кўра, 14 январ Эронда қатл куни бўлиши керак эди.
АҚШ президенти Доналд Трамп Эрон расмийлари ҳукуматга қарши норозилик намойишлари иштирокчиларини қатл этиш ниятида эмаслигини маълум қилди. Бу ҳақда NBC News хабар берди.
Трамп Оқ уйнинг Овал кабинетида сўзга чиқиб, АҚШ «Эронда қотилликлар тўхтаётганидан» хабар топганини айтди.
«Улар тўхтади. Улар тўхтамоқда ва ҳеч қандай қатл этишлар режалаштирилмаяпти. Менга ишончли манбалардан шундай маълумот беришди. Ишончим комилки, агар бу [қатллар] содир бўлса, барчамиз жуда хафа бўламиз. Улар сўнгги бир неча кун ичида кўпчилик гапирган қатлни амалга оширишмайди. Бугун қатл куни бўлиши керак эди», - деди Трамп мактаблардаги сутга оид қонунни имзолаш чоғида.
Трамп, агар мамлакатда қатллар бўлиб ўтса, АҚШ Эронга қарши «жуда қатъий чоралар» кўришидан огоҳлантирди.
Доналд Трамп аввалроқ Эрондаги ҳукуматга қарши намойишлар иштирокчиларининг ўлдирилишини қоралаган эди. Ҳуқуқ ҳимоячиларининг маълумотларига кўра, намойишлар давомида 2500 дан ортиқ киши ҳалок бўлган.
Аввалроқ, Ислом Республикаси ташқи ишлар вазири Аббос Аракчи Эрон расмийлари норозилик намойишлари иштирокчиларини осиш орқали қатл этиш ниятида эмаслигини, бундай ҳаракат варианти ҳатто кўриб чиқилмаётганини маълум қилган эди.
«Осиш ҳақида гап ҳам бўлиши мумкин эмас. Бу АҚШ президенти Доналд Трампни ушбу жараёнга жалб қилиш учун бошланган дезинформация кампаниясининг элементларидан бири бўлиб, бу фалокатли оқибатларга олиб келиши мумкин», - деди Аракчи Fox News телеканалига берган интервюсида.
Ташқи сиёсат идораси раҳбари ҳозирда Эронда «намойишлар ва протестлар йўқлигини», мамлакатда осойишталик ўрнатилганини таъкидлади.
