Трамп сурати туширилган 250 долларлик банкнота чиқарилиши мумкин — WP

The Washington Post маълум қилинишича, АҚШ Молия вазирлиги таркибидаги босма ва ўйма бюросига янги номиналдаги банкнотани ишлаб чиқиш жараёнини тезлаштириш бўйича босим ўтказилмоқда. Ташаббусни ғазначи Брендон Бич ҳамда унинг маслаҳатчиси Майк Браун илгари сураётгани айтилмоқда.

Банкнота дизайни

Лойиҳа доирасида бир нечта дизайн намуналари ҳам тайёрланган. Уларнинг бирида 250 долларлик банкнотанинг марказида Доналд Трамп сурати жойлаштирилган бўлиб, унда АҚШ президенти ва молия вазири Скотт Бессент имзолари акс этган.

Британиялик рассом Иан Александер ушбу макет мавжудлигини тасдиқлади. Унинг айтишича, Трамп билан АҚШнинг 250 йиллик юбилейи муносабати билан дизайнга Америка байроғи ранглари ва махсус логотип қўшиш масаласи ҳам муҳокама қилинган.

Нашр қайд этишича, АҚШ миллий валютасида 1866 йилдан бери тирик шахс тасвири қўлланмаган. Ўша даврда 5 центлик банкнотада Ғазначилик амалдорининг сурати жойлаштирилган эди. Доналд Трамп тасвирини банкнотага тушириш имконини берувчи қонун лойиҳаси эса 2025 йилдан буён АҚШ Конгрессида кўриб чиқилмоқда.

Шу билан бирга, босма ва ўйма бюроси мутахассислари янги банкнота ишлаб чиқиш жараёни бир неча йил давом этишини билдирган. Улар бу жараён мураккаб ҳуқуқий экспертиза ва техник хавфсизлик талабларини ўз ичига олишини таъкидламоқда.

АҚШ'нинг Мустақиллик куни

Маълумот учун, 1776-йилда қабул қилинган Мустақиллик декларациясида АҚШнинг Британия империясидан мустақил бўлгани эълон қилинган. Ушбу декларация 1776-йил 2-июл куни Пенсилвания штатининг Филаделфия шаҳрида Конгресс томонидан қабул қилинган.

Орадан икки кун ўтиб, Конгресс ҳужжатнинг таҳрирланган вариантини ҳам тасдиқлаб, уни чоп этиш ва аҳолига тарқатиш бўйича топшириқ беради. Шу сабабли 4-июл АҚШнинг ташкил топган куни сифатида қабул қилинган ва ҳозиргача Мустақиллик куни сифатида нишонланади.