Украина алоқа узилганидан фойдаланиб, қарши ҳужум бошлади — ISW

«Урушни ўрганиш институти» (ISW) маълумотига кўра, Украина армияси Днипропетровск ва Запорижжя областлари маъмурий чегараси яқинида локал қарши ҳужумлар ўтказмоқда. Таҳлилчилар бу ҳаракатлар Россия ҳарбийлари учун алоқа муаммолари юзага келган даврга тўғри келганини таъкидлайди.

12 февралга оид геолокация кадрлари Россия томонидан Гайчур дарёсининг шарқи — Добропилля ва Варваривка атрофида Украина позицияларига зарбалар берилганини кўрсатган. Бу эса Украина кучлари шу санагача ушбу нуқталарни ушлаб турганини англатади.

ISW маълумотига кўра, Россия қўшинлари ушбу позицияларни айланиб ўтишга уринган. Локал қарши ҳаракатлар ҳақидаги дастлабки хабарлар 9 февралда пайдо бўлган. Аввалига айрим россиялик ҳарбий блогерлар буни «кенг кўламли қарши ҳужум» деб атаган, кейинчалик эса гап чекланган операциялар ҳақида экани аниқлаштирилган.

Алоқа ва тактика

Таҳлилчиларга кўра, Украина кучлари Гуляйполе шимоли ва шимоли-ғарбида ҳаракат қилмоқда. Бироқ Россия қўшинларидаги алоқа муаммолари сабабли вазият тўлиқ аниқ эмас.

ISWʼнинг баҳолашича, бу ҳаракатлар қулай тактик шароитдан фойдаланишга қаратилган. 11 феврал куни НАТО вакили «BBC»га берган баёнотида айрим Украина муваффақиятлари «SpaceX» томонидан Россия қўшинларининг «Starlink» тизимидан фойдаланишини чеклаш билан боғлиқ бўлиши мумкинлигини айтган.

Шу билан бирга, Россия ҳудудида «Telegram» мессенжерининг блокланиши ҳам ҳарбий алоқа тизимига таъсир қилгани қайд этилмоқда. «Starlink» чекловлари билан биргаликда бу ҳолат фронтдаги бошқарув жараёнларини мураккаблаштирган.

Стратегик манзара

ISW хулосасига кўра, Украина ҳаракатлари Россия томонининг алоқа ва бошқарув тизимидаги узилишларидан фойдаланишга қаратилган тактик жавоб ҳисобланади.

Айни пайтда, вазият локал операциялар доирасида қолмоқда ва кенг кўламли фронт ўзгариши ҳақида хулоса чиқариш учун етарли асос йўқ. Экспертлар яқин кунлардаги майдон ҳаракатлари ва алоқа инфратузилмасидаги ўзгаришлар ривожни белгилаб беришини таъкидламоқда.