Xorazm hokimiga birinchi o‘rinbosar tayinlandi
Viloyat hokimi o‘rinbosari sifatida ishlab kelayotgan Anvar Davletov hokimning moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari bo‘ldi.
Anvar Kenjayevich Davletov Xorazm viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimiga tayinlandi. Bu haqda viloyat hokimligi matbuot xizmati xabar berdi.
Anvar Davletov 1985 yil Qo‘shko‘pir tumanida tug‘ilgan. Millati o‘zbek, ma’lumoti oliy. Mutaxassisligi – Jahon iqtisodiyoti va xalqaro iqtisodiy munosabatlar.
U viloyat hokimining ishlab chiqarishni mahalliylashtirish va sanoatda kooperatsiya aloqalarini kengaytirish masalalari bo‘yicha yordamchisi, Yangiariq tumani hokimi vazifasini bajaruvchi lavozimlarida ishlagan.
Anvar Davletov 2023 yildan beri Xorazm viloyati hokimining o‘rinbosari – viloyat investitsiyalar va tashqi savdo boshqarmasi boshlig‘i lavozimida ishlab kelayotgan edi.
Eslatib o‘tamiz, bugun, 3-fevral kuni Samarqand viloyatining 2 tumaniga hokimlar tayinlangan edi.
