Яна бир давлат Алишер Усмоновга қўйилган санкцияларни олиб ташлашни таклиф қилди

Франция Словакиянинг россиялик бизнесмен Алишер Усмоновни Европа Иттифоқининг санкциялар рўйхатидан чиқариш ҳақидаги талабини қўллаб-қувватлади. Бу ҳақда «Euronews» ўз манбаларига таяниб хабар берди.

Нашрнинг таъкидлашича, Франциянинг бу қадами Европа Иттифоқига аъзо бошқа давлатларда «жуда кучли норозилик» уйғотган.

«Бу қарорнинг сабаблари ҳақида кўплаб саволлар пайдо бўлди — кўринишидан, бу ерда биринчи навбатда иқтисодий манфаатлар муҳим рол ўйнаяпти. Европа Иттифоқига аъзо бошқа давлатлар орасида бу позицияни тушунадиганлар жуда кам», — деди нашрга европалик дипломатларнинг бири.

Европа Иттифоқи санкцияларини узайтириш учун барча давлатларнинг бир овоздан розилиги талаб қилинади. Бу эса иттифоққа аъзо исталган давлатга ушбу қарорга вето қўйиш имконини беради. Яъни, битта давлат қарши чиқса, санкцияларни узайтириш ҳақидаги қарор қабул қилинмаслиги мумкин.

Аввалроқ Словакия Усмоновга қарши санкцияларни узайтиришга қарши чиққан эди. Бундан ташқари, Братислава Михаил Фридман ҳам санкциялар рўйхатидан чиқарилишини талаб қилмоқда.

«Биз бу масалани муҳокама қилишда иштирок этяпмиз ва агар келтирилаётган далиллар ҳақиқатан ҳам ишонтирадиган бўлса ҳамда жуда кучли ҳуқуқий асосларга эга бўлса, конструктив хулосага келишга тайёрмиз», — деган эди Словакия ташқи ишлар вазири Юрай Бланар март ойида.

2025-йилда Венгрия ҳам россиялик бизнесменлар Алишер Усмонов, Михаил Фридман, Дмитрий Мазепин ва бошқа шахсларга нисбатан Европа Иттифоқи томонидан жорий қилинган санкцияларни бекор қилишни таклиф қилган эди.

«Forbes» Алишер Усмоновнинг бойлигини 14,5 миллиард долларга баҳолайди. Европа Иттифоқи Усмоновга қарши санкцияларни 2022-йил 28-февралда жорий қилган. Ўша йилнинг 3-мартида АҚШ ва Буюк Британия ҳам бизнесменга қарши чекловлар жорий қилганини эълон қилган. 11-март куни эса Канада Усмоновга қарши санкциялар киритган.

Бундан ташқари, бизнесмен Германияда солиқ тўлашдан бўйин товлаганликда айбланиб, терговга тортилган. Бунга, Усмоновнинг адвокатлари таъкидлашича, унинг кўчмас мулк ва бошқа мол-мулкка эгалиги ҳақидаги ёлғон даъволар сабаб бўлган. Усмоновнинг юристлари суд орқали бу даъволарни рад эттиришга ҳаракат қила бошлаган. Бир қатор хорижий ОАВ вакиллари ва жамоат арбоблари нотўғри маълумотларни тарқатишни тўхтатиш ҳақида ёзма мажбурият олишга мажбур бўлган. Жумладан, Усмонов АҚШнинг «Forbes» журнали, Германиянинг «Tagesspiegel» газетаси ва Австриянинг «Kurier» газетаси устидан судда ғалаба қозонган. 2025-йил май ойида Гамбург вилоят суди «Mediahuis Luxembourg S.A.» медиахолдингига қарашли нашрларга бизнесмен Алишер Усмоновни «Дилбар» суперяхтасининг эгаси деб аташни тақиқлаган.

Сентябр бошида, «IntelliNews» нашрининг хабар беришича, Усмоновнинг адвокатлари Европа Комиссияси раҳбариятига мактуб юборган. Улар санкцияларни бекор қилишни сўраган. Бунга сабаб сифатида санкциялар жорий этилишига асос бўлган ОАВ хабарлари судлар томонидан нотўғри деб топилгани ва кейинчалик ўчириб ташлангани кўрсатилган.