Янги бизнес-омбудсман тайинланди
Абдуманноп Бўриев президент ҳузуридаги Тадбиркорлик субъектлари ҳуқуқлари ва қонуний манфаатларини ҳимоя қилиш бўйича вакили лавозимига тайинланди.
Ўзбекистон президенти ҳузуридаги Тадбиркорлик субъектлари ҳуқуқлари ва қонуний манфаатларини ҳимоя қилиш бўйича вакили (бизнес-омбудсман) лавозимига Абдуманноп Абдураҳмадович Бўриев тайинланди.
Абдуманноп Бўриев 1986 йилда Тошкент вилояти Бекобод шаҳрида туғилган. У 2025 йилда Адлия вазирлиги марказий аппаратида Ташкилий-назорат ва стратегик режалаштириш бошқармаси бошлиғи лавозимига тайинланган, бунга қадар эса Ташкилий-назорат ва таҳлил бошқармасига раҳбарлик қилган.
Эслатиб ўтамиз, жорий йилнинг март ойида 2017 йилдан буён бизнес-омбудсман лавозимида ишлаб келаётган Дилмурод Касимов бош прокурор ўринбосари этиб тайинланганди.
Бизнес-омбудсманнинг асосий вазифалари:
— Тадбиркорлик фаолиятини ривожлантириш ва уларнинг ҳуқуқларини ҳимоя қилиш соҳасида давлат сиёсатини шакллантиришда иштирок этиш.
— Давлат органлари томонидан тадбиркорлар ҳуқуқларига риоя этилишини назорат қилиш.
— Тадбиркорлик субъектлари фаолиятида ўтказиладиган текширишларнинг қонунийлигини мониторинг қилиш.
— Қонунчиликни такомиллаштириш бўйича таклифлар тайёрлаш.
Эслатиб ўтамиз, Бизнес-омбудсман — тадбиркорлик субъектларининг ҳуқуқлари ва қонуний манфаатларини ҳимоя қилиш бўйича махсус ваколатли мансабдор шахс ҳисобланади. У президент томонидан лавозимга тайинланиши ва лавозимидан озод этилиши белгиланган.
