Янги Ғазо умид бўлиши мумкин – Трампнинг куёви секторнинг бош режасини тақдим қилди

АҚШ президенти Доналд Трампнинг куёви, Исроил ва ҲАМАС ўртасидаги урушни тугатиш бўйича музокараларда етакчи рол ўйнаётган Жаред Кушнер бугун, 22 январь куни Давосда қайнотаси ташаббуси билан ташкил этилган Тинчлик кенгаши низомини имзолаш маросимида Ғазо «ажойиб салоҳиятга эга» эканини айтди.

«Янги Ғазо умид бўлиши, манзилга айланиши мумкин. Бугун Ғазонинг ўзидаёқ бир нечта имконсиз деб ҳисобланган ишларни амалга оширдик, нега янада кўпроқ имконсиз ишларга қодир бўлмаслигимиз керак?» — деди Кушнер.

У “тинчлик – бу бизнес келишувидан фарқ қилиши”ни тан олди. Бироқ Давосда экранга чиқарилган бир қатор слайдлар орқали Кушнер Ғазони қайта ривожлантириш бўйича “бош режа”ни тақдим этди ва АҚШ Президенти маъмурияти урушни тугатиш ҳамда минтақани ўзгартиришга қаратилган кўп босқичли саъй-ҳаракатлардан ташқари «Б режа»га эга эмаслигини айтди.

Кушнер режанинг катта қисми ҲАМАСнинг қуролсизланишига боғлиқ эканини таъкидлаб, АҚШ ўт очишни тўхтатиш келишувининг шу қисмини “қатъий таъминлашини” билдирди.

«Агар ҲАМАС қуролсизланмаса, айнан шу ҳолат Ғазо ва Ғазо аҳолисини ўз орзуларини амалга оширишдан тўсиб туради», деди Кушнер.

Президентнинг куёви, шунингдек, иштирокчиларни шубҳа ва бошқа давлатлар билан бўлган рақобатни «Тинчлик кенгаши» доирасида бир чеккага суриб, «30 кунга хотиржам бўлишга» чақирди.

«Келинг, қўлимиздан келганича бирга ишлашга ҳаракат қилайлик. Бу ердаги мақсадимиз – Исроил билан Фаластин халқи ўртасида тинчликка эришиш», деди у.

Доналд Трамп эса урушдан вайрон бўлган ҳудудни қайта қуриш ҳақида гапирар экан, Ғазони «жуда чиройли мулк» деб атаб, ўзини «қалбан кўчмас мулк соҳаси одами» деб таърифлади.

«Мен аслида кўчмас мулк соҳаси одамиман ва бунинг барчаси жойлашувга бориб тақалади. Мен айтдим: қаранг, денгиз бўйида жойлашган манзил. Қаранг, бу қандай ажойиб мулк. У қанчадан-қанча одамлар учун нималарга айланиши мумкин. Бу жуда, жуда ажойиб бўлади», — деди у Давосда ўтган “Тинчлик кенгаши” маросимида.

Ўзбекистон Республикаси Президенти Шавкат Мирзиёев ҳам Давосда Тинчлик кенгаши низомини имзолаш маросимида иштирок этганди.