Янги меҳнат бозори архитектураси: техникумлар таянчга айланади

Президент Шавкат Мирзиёев Олий Мажлис ва Ўзбекистон халқига Мурожаатномасида келгуси йил учун дастурнинг тўртинчи устувор йўналиши сифатида касбларни ривожлантириш ва янги меҳнат бозори архитектурасини яратишни белгилади. Янги технологиялар, рақамлаштириш ва сунъий интеллект таъсирида дунёда иш ўринларининг шакли ва мазмуни кескин ўзгармоқда.

Президент таъкидлашича, яқин беш йилда мавжуд касбларнинг 30 фоизи тўлиқ автоматлашади, яна 50 фоизи эса янги малака ва кўникмаларни талаб қилади. Бу жараёнлар саноат, қишлоқ хўжалиги ва транспортда аллақачон кундалик ҳолатга айланган.

Шу сабаб мамлакат меҳнат бозори касб, малака, технология ва таълимни бирлаштирадиган ягона механизм сифатида ишлаши керак. Бунинг марказида касбий таълим, айниқса техникумлар туради.

Яқинда техникумларни модернизация қилиш бўйича беш йиллик дастур тасдиқланди. 2026 йилдан бошлаб ҳар йили камида 100 та техникум тўлиқ таъмирланиб, талаб юқори бўлган касблар учун замонавий ускуналар билан жиҳозланади.

Германия, Швейцария, Буюк Британия, Хитой ва Кореянинг илғор таълим дастурлари жорий этилган техникумлар сони 100 тага етказилади. 2026 йилда 7 та вилоятда, 2027 йилда эса барча ҳудудларда Илғор касбий маҳорат техникумлари ва «Касблар шаҳарчаси» иш бошлайди.

Техникумлар ва иш берувчилар ҳамкорлиги ҳам кучайтирилади. «Дуал таълим»ни самарали жорий этган корхоналарга 7 йилгача 5 млрд сўм имтиёзли кредит берилади, тадбиркорлик рейтингида қўшимча балл тақдим этилади. 2026 йилдан эса 100 минг техникум ўқувчисига илк бор стипендия жорий этилади.