Еврокомиссия раҳбари Зеленскийнинг танқидидан хафа бўлди

Давосдаги Жаҳон иқтисодий форуми доирасида Украина президенти Воладимир Зеленскийнинг Европа Иттифоқини ҳаракатсизликда айблашига жавобан, Еврокомиссия раҳбари Урсула фон дер Ляйен иттифоқнинг молиявий кўмаги ва амалий қадамлари сўзлардан кўра кучлироқ эканини таъкидлади.

Еврокомиссия раҳбари Урсула фон дер Ляйен Украина президенти Воладимир Зеленскийнинг Европа Иттифоқи манзилига айтган кескин танқидларидан хафа бўлганини яширмади. Украина етакчиси Давосдаги нутқида европалик иттифоқчиларни фақат баёнотлар билан чекланиб қолаётганликда ва реал ҳаракатларни амалга оширмаётганликда айблаган эди.

Фон дер Ляйен ушбу айбловларга жавобан Европа Иттифоқининг хатти-ҳаракатлари ҳар қандай қуруқ сўздан кўра таъсирлироқ эканини билдирди. Унинг таъкидлашича, Европа Украинани қўллаб-қувватлашда нафақат сиёсий, балки мислсиз даражадаги иқтисодий ёрдамларни ҳам кўрсатиб келмоқда.

Расмий маълумотларга кўра, сўнгги тўрт йил ичида Европа Иттифоқи томонидан Киевга жами 193 миллиард евро миқдорида ёрдам ажратилган. Шунингдек, яқин икки йил учун яна 90 миллиард евро маблағ йўналтирилиши кўзда тутилган. Еврокомиссия раҳбари ушбу рақамларнинг ўзи иттифоқнинг Украинага бўлган содиқлигини исботлаш учун етарли эканини ва Европа ўз мажбуриятларини бажараётганини алоҳида қўшимча қилди.

Воладимир Зеленский ўз чиқишида Европанинг мустақиллиги ва қатъияти етарли эмаслигини танқид қилиб, буни Россия ва Хитой учун нотўғри сигнал деб атади. Хусусан, у ЕИнинг Гренландияга юборган ҳарбий контингенти ҳажми ўта кичик эканини мисол қилиб келтирди ва буни европалик ҳамкорларнинг заифлиги белгиси сифатида баҳолади. Унинг фикрича, бундай ёндашув глобал хавфсизлик таҳдидларига қарши туришда кутилган самарани бермайди.