Европа Марказий банки евро банкнотларининг янги дизайн вариантлари намойиш этди
Европа Марказий банки янги евро банкнотлари учун 10 та финал дизайнни тақдим этди. Амалдаги евро банкнотлари эса муомалада қолади. Янги сериянинг якуний дизайни 2026 йил охиригача танланиши режалаштирилган.
© Foto: BloombergЕвропа Марказий банки янги авлод евро банкнотлари учун танлаб олинган 10 та финал дизайн лойиҳасини эълон қилди. Шу билан бирга, уларни баҳолаш бўйича оммавий овоз бериш ҳам бошланди.
Жамоатчилик 21 сентябргача ўзларига маъқул бўлган вариантлар бўйича фикр билдириши мумкин. Финал босқичига чиққан дизайнлар икки асосий мавзуга бўлинган.
Биринчи йўналиш — «Европа маданияти». Унда опера хонандаси Мария Каллас, бастакор Людвиг ван Бетховен, олим Мария Склодовска-Кюри, ёзувчи Мигел де Сервантес, рассом ва ихтирочи Леонардо да Винчи ҳамда тинчлик фаоли Берта фон Суттнер каби тарихий шахслар акс эттирилган.
Иккинчи мавзу — «Дарёлар ва қушлар». Бу йўналиш Европа табиати, биологик хилма-хиллиги ва экологик меросини ифодаловчи қушлар ҳамда дарёлар тасвирларини ўз ичига олади.
банкнотлардан намуналар
Янги ҳимоя технологиялари
Янги евро банкнотлари нафақат ташқи кўриниши, балки хавфсизлик жиҳатидан ҳам янгиланади. Уларда қалбакилаштиришга қарши янада кучли ҳимоя элементлари ва замонавий технологиялар қўлланилиши режалаштирилган.
Шунингдек, банкнотлар кўзи ожиз ва заиф кўрувчи инсонлар учун қулайроқ бўлишига алоҳида эътибор қаратилган. Ишлаб чиқариш жараёнида атроф-муҳитга таъсирни камайтирувчи материаллардан фойдаланиш ҳам режалаштирилмоқда.
Европа Марказий банки бошқарув кенгаши якуний дизайнни 2026 йил охиригача танлаши кутилмоқда. Шундан кейин техник синовлар ва оммавий ишлаб чиқариш босқичи бошланади.
Эски банкнотлар қолади
Янги сериянинг муомалага чиқиши учун яна бир неча йил талаб этилади. Шу вақтгача амалдаги евро банкнотлари тўлиқ кучда қолади.
Марказий банк маълум қилишича, ҳозирги банкнотлар ўз қийматини сақлаб қолади ва янги серия билан бир вақтнинг ўзида муомалада бўлади. Бу евро банкнотларининг 2002 йилда ягона валюта муомалага киритилганидан буён амалга оширилаётган илк тўлиқ қайта дизайни ҳисобланади.
