Заргарларга ҚҚСнинг 80 фоизи қайтарилади

Ўзбекистонда заргарлик соҳасида фаолият юритувчи тадбиркорлар учун янги солиқ имтиёзлари жорий этилди. Ҳукуматнинг 2024 йил 7 ноябрдаги 745-сон қарорига киритилган қўшимчалар асосида ҚҚСнинг бир қисмини қайтариш тартиби белгиланди.

Янги тартибга кўра, заргарлик буюмларини ишлаб чиқариш ва уларни чакана сотиш билан шуғулланувчи тадбиркорларга 2026 йил 1 январдан бошлаб бюджетга тўланган қўшилган қиймат солиғининг 80 фоизи қайтарилади.

Қайд этилишича, мазкур тартиб вақтинчалик ҳисобланади ва 2028 йил 1 январга қадар амал қилади. Бу орқали соҳадаги тадбиркорлик фаолиятини рағбатлантириш ва сояни қисқартириш мақсад қилинган.

Тадбиркорлар солиқ ҳисоботини тақдим этгандан сўнг, аммо 3 ойдан кечиктирмасдан, тўланган солиқнинг бир қисмини қайтариш учун мурожаат қилиш ҳуқуқига эга. Мурожаатлар автоматлаштирилган дастур орқали кўриб чиқилади.

Қандай қайтарилади?

Солиқ маблағларини қайтариш бир қатор шартлар бажарилганда амалга оширилади. Жумладан, ҳисобланган солиқ белгиланган муддатда тўлиқ тўланган бўлиши, тушумнинг камида 80 фоизи заргарлик маҳсулотлари савдосидан шаклланган бўлиши ва барча операциялар тўғри идентификация кодлари билан расмийлаштирилган бўлиши шарт.

Шунингдек, заргарлик буюмларини ишлаб чиқарувчилар учун солиқ базаси маҳсулотни сотиш нархи билан унинг таркибидаги қимматбаҳо металл ва тошлар қиймати ўртасидаги ижобий фарқ асосида ҳисобланади.

Эслатиб ўтамиз, аввалроқ қисқа муддатда заргарлик саноатида ишлаб чиқариш 3,3 карра ўсиб, 13 триллион сўмдан ошгнлиги ҳақида хабар берилган эди.