Зеленский: «АҚШ урушни ёзгача якунламоқчи»
Украина президентининг айтишича, Вашингтон Москва ва Киевга энергетика бўйича танаффусни тиклашни таклиф қилди ва урушни ёз бошигача якунлаш графигини муҳокама қилмоқда.
Украина президенти Володимир Зеленский АҚШ Россия ва Украинага энергетика соҳасида деэскалация қилиш, яъни энергетик танаффусни қайта тиклашни таклиф этганини маълум қилди. Унинг айтишича, Украина бу ташаббусни қўллаб-қувватлаган, аммо Россия ҳали расман жавоб бермаган.
Президент журналистлар билан мулоқотда АҚШ урушни тахминан июн ойигача якунлаш вариантини кўриб чиқаётганини ва эҳтимол, айнан шу график асосида томонларга босим ўтказишини айтди. «Америка икки томонга ҳам урушни ёзгача якунлашни таклиф қиляпти», деди у.
Зеленскийга кўра, Вашингтон барча асосий келишувларни бир вақтнинг ўзида имзолаш имкониятини ҳам кўриб чиқмоқда. Шунингдек, бир ҳафта ичида Майами шаҳрида янги уч томонлама музокаралар ўтказиш таклиф этилган, Украина бу таклифга розилик билдирган.
Музокаралар мазмуни
Президентнинг таъкидлашича, Абу Дабида бўлиб ўтган музокараларда эҳтимолий оташкесимнинг техник жиҳатлари ва уни назорат қилиш механизмлари муҳокама қилинган. Бу жараёнда АҚШнинг иштироки муҳим элемент сифатида кўрилмоқда.
Донбасс масаласига тўхталган Зеленский Украина «турган жойда қолиш» тамойилини ўт очишни тўхтатиш учун энг ишончли модел деб ҳисоблашини айтди. Унинг сўзларига кўра, бу позиция Украина делегацияси томонидан аниқ белгилаб қўйилган.
Украина президенти шунингдек, украин томони ўзининг «қизил чизиқлари»ни очиқ айтганини таъкидлаб, АҚШ ва Россия ўртасида Украина иштирокисиз тузиладиган ҳар қандай келишувлар мамлакат Конституциясига зид бўлмаслиги шартлигини билдирди.
Энергетика ва хатарлар
Зеленский ҳал этилмаган масалалар орасида Запорижжя атом электр станцияси тақдири қолиб кетаётганини таъкидлади. Унинг айтишича, бу масала алоҳида эмас, балки ҳудуд экотизимини тиклаш билан боғлиқ ҳолда комплекс тарзда ҳал қилиниши керак.
Эслатиб ўтамиз, январь ойи охирида АҚШ президенти Доналд Трамп Россия президенти Владимир Путин билан энергия объектларига зарбаларни вақтинча тўхтатиш бўйича келишувга эришилганини маълум қилган эди. Россия томони 1 февралгача ҳужумларни тўхтатганини тасдиқлаган, аммо 3 феврал куни Украина инфратузилмасига янги ёпирилма зарбалар берилди. Шундан сўнг Трамп Кремл «ўз сўзида тургани»ни айтиб, урушни якунлаш истагини яна бир бор билдирган.
