Зеленский: Россия тинчлик битимини рад этса, АҚШ Украинани қўллаб-қувватлайди
Володимир Зеленский АҚШ Украинага хавфсизлик кафолатлари беришга тайёрлигини, Россия тинчликдан бош тортса эса қўллаб-қувватлаш давом этишини маълум қилди.
Володимир Зеленский АҚШ президенти Доналд Трамп билан учрашувидан сўнг, тинчликка альтернатив йўқлигини, бироқ Москва келишувдан воз кечса, Вашингтон Киевни қўллаб-қувватлашда давом этишини айтди. Бу ҳақда Украина оммавий ахборот воситалари хабар берди.
Зеленскийнинг таъкидлашича, ҳар қандай келишув реал ва ишончли хавфсизлик кафолатларига таяниши шарт. Унинг сўзларига кўра, АҚШ билан эришилган келишувлар Конгресс томонидан, Украинада эса парламент томонидан тасдиқланиши керак. Европа давлатлари билан тузиладиган шартномалар эса миллий парламентлар даражасида ратификация қилиниши лозим.
Украина раҳбари 20 пунктдан иборат урушни якунлаш режаси ҳақида ҳам тўхталиб, ушбу ҳужжатни энг кучли легитимация шакли сифатида умумхалқ референдуми орқали мустаҳкамлаш зарурлигини билдирди. Шу билан бирга, у референдум ёки сайловлар фақат камида 60 кунлик тўлиқ ўт очишни тўхтатиш ва ишончли хавфсизлик тизими мавжуд бўлган тақдирдагина ўтказилиши мумкинлигини таъкидлади. Айни пайтда, Россия бундай шартларга розилик бермаётгани қайд этилди.
Учрашув давомида иқтисодий масалалар ҳам муҳокама қилинган. Зеленскийнинг айтишича, иқтисодий пакет АҚШ бизнесининг Украинада фаол иштирокини, мамлакатни қайта тиклаш учун махсус шароитлар яратишни ҳамда эҳтимолий эркин савдо келишувини ўз ичига олади.
Президент, шунингдек, Украина 20 пунктли тинчлик режасини имзолашга яқин эканини, хавфсизлик кафолатлари ва Европа давлатларининг «кўнгиллилар коалицияси»да фаол иштирок этишига умид қилаётганини билдирди.
