2026 йил бошида сотиб олишга арзийдиган энг яхши смартфонлар

Машҳур технология нашри «Tom’s Guide» 2026 йил бошида харид қилиш учун энг яхши смартфонлар рейтингини тақдим қилди. Рўйхат турли эҳтиёж ва бюджетларга мос моделларни қамраб олади, бу эса харидорларга осон танлов қилиш имконини беради.

Рейтингда умумий энг яхши смартфон сифатида «Apple iPhone 17 Pro Max» кўрсатилди. Мутахассислар ушбу моделни янги дизайн, «A19 Pro» процессори, узоқ автоном иш вақти ва 48 мегапикселли уч камерали тизими учун юқори баҳолаган. Қурилма максимал имкониятларни истаган фойдаланувчилар учун мўлжалланган.

Нарх ва сифат нисбати бўйича энг яхши танлов сифатида «Google Pixel 9a» қайд этилди. У ёрқин дисплей, тунги ва макро режимли камералар, сунъий интеллектга асосланган функциялар ҳамда 2032 йилгача давом этадиган янгиланишлар билан ажралиб туради.

Қатланувчи смартфонлар орасида «Samsung Galaxy Z Flip 7» энг яхши деб топилди. Унинг компакт корпуси, катта ташқи экрани ва сифатли камералари дизайн ва портативликни қадрлайдиганлар учун мос.

Рейтингга кирган бошқа моделлар ҳам эътиборга лойиқ. «Samsung Galaxy S25 Ultra» «Android» қурилмалари орасида энг яхши камерага эга деб баҳоланган. «Google Pixel 10 Pro» эса сунъий интеллект функциялари бўйича етакчи ҳисобланади. «Google Pixel 10» флагманнинг арзонроқ, аммо имкониятли версияси сифатида ажралиб туради.

Автоном иш вақти бўйича «OnePlus 15» етакчилик қилади — тестларда у 25 соатдан ортиқ ишлашни намоён этган. Шунингдек, «Nothing Phone 3a Pro» ўзига хос дизайн ва мувозанатли хусусиятлари билан рўйхатдан жой олган.

Мутахассисларнинг таъкидлашича, 2026 йил бошида смартфон танлашда камера сифати, автоном иш вақти ва сунъий интеллект функциялари асосий мезонларга айланмоқда.