«Pegasus Airlines» Ўзбекистоннинг учта шаҳрига парвозларни бошлайди
Туркиянинг «Pegasus Airlines» авиакомпанияси Истанбулдан Бухоро, Андижон ва Термизга мунтазам рейсларни йўлга қўйишни режалаштирмоқда. Чипталар 99 доллардан бошланади.
© wikipediaТуркиянинг арзон авиачипталари билан танилган «Pegasus Airlines» компанияси Ўзбекистон бозорига кирмоқда. Авиакомпания режасига кўра, Истанбулдан Бухорога илк парвоз 2026 йил 14 декабрда, Андижонга 18 декабрда, Термизга эса 2027 йил 1 мартда амалга оширилиши керак.
Янги йўналишлар ҳақидаги маълумотлар авиакомпаниянинг расмий сайти ва мобил иловасида жойлаштирилган. Чипталар сотуви ҳам бошланган.
Парвозлар қачон бошланади ва чипталар қанча туради?
Авиакомпания эълон қилган жадвалга кўра, янги рейслар қуйидаги саналарда бошланиши режалаштирилган:
Истанбул — Бухоро: 2026 йил 14 декабр;
Истанбул — Андижон: 2026 йил 18 декабр;
Истанбул — Термиз: 2027 йил 1 март.
Янги йўналишлар бўйича авиачипталар нархи 99 доллардан бошланади. Якуний нарх сафар санаси, танланган йўналиш ва бўш ўринлар сонига қараб ўзгариши мумкин.
Рейслар Истанбулдаги қайси аэропортдан амалга оширилади?
Янги йўналишлар Истанбулдаги Сабиха Гўкчен халқаро аэропорти орқали ташкил этилиши кутилмоқда. Бу аэропорт «Pegasus Airlines»нинг муҳим транзит марказларидан бири ҳисобланади.
Янги рейслар Бухоро, Андижон ва Термиздан Истанбулга бевосита бориш имконини беради. Йўловчилар, шунингдек, Истанбул орқали Лондон, Манчестер, Париж ва Прага каби Европа шаҳарларига бошқа рейслар билан ўтиш имкониятини кўриб чиқиши мумкин.
«Pegasus Airlines» Ўзбекистонда парвоз қилиш учун рухсат олган
Ўзбекистон Республикаси Транспорт вазирлиги ҳузуридаги Фуқаро авиацияси агентлиги реестрида «Pegasus Airlines» компанияси қайд этилган. Ҳужжатга кўра, авиакомпания 2026 йил 6 октябрда йўловчи ташиш учун 58-К рақамли эксплуатацион рухсатнома олган.
Авиакомпаниянинг Ўзбекистон бозорига чиқиш режаси аввал ҳам муҳокама қилинган. 2019 йилда Туризмни ривожлантириш давлат қўмитаси вакиллари «Pegasus Airlines» билан мамлакатга парвозларни йўлга қўйиш бўйича музокаралар олиб борилаётганини билдирган.
