2026 йилнинг энг яхши смартфонлари эълон қилинди
Tom’s Guide мутахассислари iPhone 17 Pro Max, Samsung Galaxy S26 Ultra, Google Pixel 10 ва бошқа янги моделларни солиштириб, 2026 йилнинг энг яхши смартфонлари рейтингини шакллантирди.
© Tom's Guide2026 йилнинг биринчи чораги якунларига кўра энг яхши смартфонлар рўйхати эълон қилинди. Бу ҳақда Tom’s Guide портали хабар берди. Мутахассислар рейтингни ишлаш тезлиги, камера сифатлари, батарея қуввати ва умумий фойдаланиш қулайлиги каби мезонлар асосида шакллантирган.
Рейтингда энг яхши смартфон сифатида iPhone 17 Pro Max тан олинди. У кучли процессор, узоқ ишлайдиган батарея ва юқори сифатли камераси билан ажралиб туради. Шунингдек, янгиланган дизайн ва iOS 26 тизими ҳам унинг устунликларидан бири сифатида қайд этилган.
Android сегментида эса Samsung Galaxy S26 Ultra энг яхши деб топилди. У катта дисплей, кучли процессор ва юқори даражадаги зум камераси билан фойдаланувчиларни жалб қилмоқда.
Ўрта ва арзон сегмент етакчилари
Мутахассислар ўрта нарх сегментида Google Pixel 10а моделини энг яхши деб баҳолаган. У нисбатан арзон бўлишига қарамай, сунъий интеллект асосидаги функциялари билан ажралиб туради.
Энг “ақлли” смартфон сифатида Google Pixel 10 Pro кўрсатилди. Ундаги илғор SI тизимлари ва камера имкониятлари мутахассислар томонидан юқори баҳоланган.
Шу билан бирга, мувозанатли вариант сифатида iPhone 17 ва OnePlus 15 қайд этилди. Арзонроқ, лекин яхши камерага эга модель сифатида Google Pixel 10 тилга олинган.
Дизайн ва инновациялар
Энг чиройли дизайнга эга смартфон сифатида Nothing Phone 4a Pro тан олинди. Шунингдек, Galaxy Z Flip 7 энг яхши букланадиган смартфон сифатида қайд этилди.
Мутахассислар хулосасига кўра, 2026 йил бошида смартфон бозорида рақобат кескинлашган. Айниқса, Apple ва Google юқори технологияли моделлари билан устунлик қилмоқда, Samsung эса Android сегментида кучли рақобатчи бўлиб қолмоқда.
