5 йил ўқиш ва 1 йил амалиёт: Президентга тиббиёт кадрларини тайёрлашнинг янги тизими тақдим этилди

Президент Шавкат Мирзиёев тиббиёт ва фармацевтика соҳасида кадрлар тайёрлаш, уларни давлат рўйхатидан ўтказиш ҳамда узлуксиз касбий таълимни такомиллаштириш бўйича таклифлар билан танишди. Бу ҳақда президент матбуот хизмати хабар берди.

Янги ёндашув тиббий таълимни фақат назарий билим беришдан амалий кўникмалар ва аниқ компетенцияларни шакллантиришга ўтказишни назарда тутади. Таълим дастурлари халқаро стандартларга мослаштирилиб, мутахассисларнинг билим ва малакасини холис баҳолаш механизми кучайтирилади.

Таклифлар Кембриж, Пенсилвания ва Гарвард университетлари тавсиялари асосида халқаро ва маҳаллий экспертлар иштирокида ишлаб чиқилган. Қабул параметрлари эса ҳудудлар ва тиббиёт муассасаларининг реал эҳтиёжи ҳамда кадрлар етишмовчилигидан келиб чиқиб белгиланади.

Олти йиллик янги таълим

2027/2028 ўқув йилидан «Даволаш иши» ўрнига 6 йиллик «Умумий тиббиёт» бакалавриат дастурини жорий этиш таклиф қилинмоқда. Бунда дастлабки беш йил таълимга, кейинги бир йил эса тўлиқ амалий тайёргарликка ажратилади.

Дастурни муваффақиятли тугатган битирувчилар оилавий шифокор сифатида ишлаш имкониятига эга бўлади. Шу орқали бирламчи тиббий ёрдам учун зарур кадрларни тайёрлашга эътибор кучайтирилади.

Оилавий тиббиёт резидентурасида ҳам таълим ва амалиётни яқинлаштириш кўзда тутилган. Резидентлар оилавий поликлиникаларда бир вақтнинг ўзида ўқиш ва амалиёт ўташ имкониятига эга бўлади. Тор мутахассисликлар босқичма-босқич резидентурага ўтказилади, магистратура эса асосан илмий-педагогик кадрлар тайёрлашга йўналтирилади.

Фармацевтикада дуал таълим

Ўрта тиббиёт кадрлари тайёрлашда ҳам янги ёндашувлар жорий этилади. Олий маълумотли ҳамшираларнинг ташхис, даволаш ва профилактика жараёнларида шифокорга яқин кўмакчи сифатидаги ваколатларини кенгайтириш режалаштирилмоқда.

Фармацевтика таълими эса ишлаб чиқариш билан янада яқинлаштирилади. Корхоналар эҳтиёжидан келиб чиқиб дуал таълим кенгайтирилиб, амалий машғулотлар улуши оширилади.

Талабалар дори воситаларини ишлаб чиқиш, ишлаб чиқариш, сифат назорати ва стандартлаштириш жараёнларига бевосита жалб этилиши кўзда тутилмоқда.