Тошкентда қизамиқ тарқалдими? Санэпидқўмита миш-мишларга ойдинлик киритди
ССВ Тошкентда қизамиқ касаллигига гумон қилинган 290 та ҳолат қайд этилгани, шунингдек, беморлар билан мулоқотда бўлган 10 минг нафардан зиёд шахс рўйхатга олингани ҳақида тарқалган хабарлар юзасидан муносабат билдирди.
Тошкент шаҳри ва бутун мамлакат бўйлаб қизамиқ касаллиги билан боғлиқ эпидемиологик вазият барқарор. Бу ҳақда Санитария-эпидемиологик осойишталик ва жамоат саломатлиги қўмитасининг Тошкент шаҳар бошқармаси расмий муносабатида таъкидланган.
«Айни пайтда нафақат пойтахт, балки бутун мамлакатимизда қизамиқ касаллиги билан боғлиқ эпидемиологик вазият барқарор. Хавотирланишга ҳеч қандай асос йўқ», - дейилади баёнотда.
Ижтимоий тармоқларда Тошкентда қизамиққа гумон қилинган 290 та ҳолат қайд этилгани ва беморлар билан мулоқотда бўлган 10 мингдан зиёд шахс рўйхатга олингани ҳақида хабарлар тарқалган эди.
Қўмитанинг таъкидлашича, мазкур рақамлар қисқа вақт ичида ёки айни кунда аниқланган ҳолатлар эмас. Бу 2026 йилнинг ўтган тўққиз ойи давомида қайд этилган жамланма кўрсаткич бўлиб, уларни тўсатдан тарқалган эпидемия сифатида талқин қилиш нотўғри ҳисобланади.
Қўмитага кўра, касалланиш кўрсаткичи 2025 йилнинг мос даврига нисбатан 40 фоизга камайган.
Расмий маълумотларга кўра, жорий йилнинг ўтган тўққиз ойи давомида Тошкент шаҳрида режали эмлаш тадбирлари фаол давом эттирилган. Ушбу давр мобайнида 47 494 нафар 1 ёшли ҳамда 42 767 нафар 6 ёшли бола КПК (қизамиқ, эпидпаротит, қизилча) вакцинаси билан эмланган.
