Алюминий нархи кескин ошди

Лондон металл биржасида алюминий нархлари кескин ўсишни қайд этди. Уч ойдан кейин етказиб бериладиган алюминий фючерслари 30-март кунги савдоларда 5,73 фоизга ошиб, бир тонна учун 3463 долларга етди.

Савдо жараёнида нарх 3492 долларгача кўтарилиб, 19-мартдан бери энг юқори даражага чиқди. Шу билан бирга, кўрсаткич сўнгги тўрт йиллик рекорд — 3546,5 долларга ҳам яқинлашди.

«Bloomberg» маълумотига кўра, алюминий нархининг ўсишига Эрон томонидан Яқин Шарқдаги иккита ишлаб чиқариш объектига қилинган ҳужумлар сабаб бўлган. Бу ҳолат минтақадаги етказиб бериш занжирига жиддий таъсир кўрсатиши мумкин.

Яқин Шарқ минтақаси алюминий ишлаб чиқаришда муҳим ўрин тутади. Шу сабабли мазкур ҳудуддаги ҳар қандай узилиш глобал бозорда нархларнинг тез ўсишига олиб келади.

Минтақадаги энг йирик ишлаб чиқарувчилардан бири — «Emirates Global Aluminium» компанияси 28-март куни Абу-Дабидаги заводига жиддий зарар етганини маълум қилди. Баҳрайндаги «Aluminium Bahrain» компанияси эса ўз корхонасидаги зарар кўламини баҳолашда давом этмоқда.

Экспертларга кўра, АҚШ, Исроил ва Эрон ўртасидаги кескинлик алюминий таъминотига оид хавотирларни янада кучайтирган. Форс кўрфази давлатлари жаҳон алюминий таъминотининг қарийб 9 фоизини таъминлайди.

Айни пайтда, Ҳўрмуз бўғози орқали экспорт чекланиши ишлаб чиқариш ва логистика жараёнларига босимни кучайтирмоқда. Айрим компаниялар ишлаб чиқариш ҳажмини қисқартиришга мажбур бўлди.

Таҳлилчилар фикрича, геосиёсий хавфлар сақланиб қолса, алюминий нархлари яқин ойларда янада кўтарилиши мумкин.