Apple смартфон бозорида жаҳон етакчилигини қайтармоқда

Таҳлилларга кўра, Apple 2025 йил якунлари бўйича дунё смартфон бозоридаги етакчиликни қайтариши мумкин. Business Insiderʼнинг Counterpoint Research ҳисоботига асосланиб ёзишича, компания сотув кўрсаткичларида Samsung’ни ортда қолдиришга яқин турибди. Бу тенденция Apple учун 2011 йилдан бери кузатилмаган ҳолат бўлиб, глобал бозорда кучлар нисбати янги босқичга кирганини англатади.

Энг катта туртки iPhone 17 сериясининг муваффақияти билан боғлиқ. Янги моделнинг дастлабки сотувлари ўтган йилги iPhone 16 натижаларидан анча юқори чиққан. Талабнинг ўсиши, айниқса, АҚШ ва Хитой каби стратегик бозорларда кескин намоён бўлди. Apple октябр ойида ушбу мамлакатларда икки хонали ўсиш қайд этганини билдирди, Европа бозорларида ҳам ижобий динамика сезилди.

Бозор шароити қийинлашганига қарамай, смартфонларни янгилаш цикли узайган бўлса-да, Apple маҳсулотлари учун барқарор талаб сақланиб қолмоқда. Истеъмолчиларнинг умумий ишонч индексининг пасайиши, Трамп маъмурияти жорий этган янги тарифлар ва глобал иқтисодий ноаниқликлар фонида компания ўз ўрнини мустаҳкамлашда давом этди. Тим Кук 2025 йилнинг охирги чораги тарихий натижаларни олиб келишини таъкидламоқда.

Инвесторлар кайфиятига Вашингтон ва Пекин ўртасидаги риториканинг юмшаши ҳам ижобий таъсир қилди. Хитой Apple учун асосий ишлаб чиқариш майдони ва энг йирик сотув бозорларидан бири бўлиб қолмоқда. АҚШ президенти Доналд Трампнинг Си Жинпинг билан суҳбатдан сўнг билдирган «муносабатларимиз жуда мустаҳкам» деган баёноти компания акциялари савдосида барқарорлик яратди.

Counterpoint Research таҳлилчиларига кўра, 2025 йилда iPhone сотувлари умумий ҳисобда 10 фоизга ўсади. Бу кўрсаткич Samsung натижасидан икки баравар юқори. Apple нинг глобал стратегияси, айниқса техник имкониятларни янгилаш, камера функционалини кучайтириш ва аккумулятор самарадорлигини ошириш орқали янада мустаҳкамланмоқда. Компания 243 миллион қурилма сотиши мумкинлиги қайд этилмоқда.