«Apple» yangi «MacBook Neo» muvaffaqiyati sababli chiplar taqchilligiga uchradi

«Apple» kompaniyasi yangi «MacBook» Neo noutbuklari uchun chiplar taqchilligiga duch keldi. Bu haqda «Bloomberg» jurnalisti Tim Kalpanga tayanib MacRumors nashri xabar bermoqda.

Gap shundaki, kompaniya «Neo» modelida iPhone 16 Pro uchun ishlab chiqarilgan, lekin texnik jihatdan biroz «kesilgan» A18 Pro protsessorlaridan foydalangan. Bu strategik yurish avval boshida xarajatlarni kamaytirishga xizmat qilgan edi, biroq noutbukning ommalashib ketgani «Apple»ning hisob-kitoblarini chippakka chiqardi.

Dastlabki rejaga ko‘ra, «Apple» 5-6 million dona «MacBook Neo» ishlab chiqarishni mo‘ljallagan edi. Ammo sotuvlar hajmi shu qadar yuqori bo‘ldiki, mavjud chiplar zaxirasi kelgusi yilgi A19 Pro chiqishigacha yetmasligi ma’lum bo‘ldi. Endi kompaniya yoki eski A18 Pro chiplarini qaytadan buyurtma qilishi, yoki boshqa qurilmalar uchun mo‘ljallangan ishlab chiqarish quvvatlarini qayta taqsimlashi kerak. Bu esa ishlab chiqarish tannarxining oshishiga va kompaniya foydasining kamayishiga olib keladi.

Hozir «Apple» oldida bir nechta qiyin tanlov turibdi: 599 dollarlik bazaviy modeldan voz kechish yoki A19 Pro chipli yangi modelni muddatidan oldin chiqarish. Har ikki variant ham kompaniya uchun katta xarajat demakdir. Shunga qaramay, «Apple» yangi foydalanuvchilarni o‘z ekotizimiga jalb qilish uchun vaqtincha past foyda bilan ishlashga rozi bo‘lishi ham mumkin. Noutbukning arzonligi sababli paydo bo‘lgan bu «shirin» muammo «Apple»ning ta’minot zanjirini jiddiy sinovdan o‘tkazmoqda.

Ishlab chiqarishdagi texnik jihatlar

Apple xarajatlarni tejash uchun iPhone 16 Pro chiplarini saralash (binning) usulidan foydalangan. 6 yadroli GPUga ega mukammal chiplar smartfonlarga, 5 yadrolilari esa «MacBook Neo»ga o‘rnatilgan edi.

Biroq, zaxiralar tugagach, «Apple» endi ataylab «kesilgan» chiplarni buyurtma qilishiga to‘g‘ri keladi. Bu esa chipning har bir birligi uchun tannarxni sezilarli darajada oshiradi, chunki avvalgidek «ishlab chiqarish chiqindisi»dan foydalanish imkoni qolmaydi.

Bozordagi strategik o‘zgarishlar

Agar «Apple» 599 dollarlik model narxini oshirsa yoki uni sotuvdan olsa, bu xaridorlar orasida norozilik keltirib chiqarishi mumkin. «MacBook Neo» aynan o‘z narxi bilan bozorda inqilob qilgan edi.

Kompaniyaning keyingi qadami ekotizimni kengaytirish va marjinallik o‘rtasidagi muvozanatni topishga qaratiladi. Ehtimol, «Apple» chiplar taqchilligini qoplash uchun «MacBook Neo»ning yuqoriroq modifikatsiyalariga urg‘u berib, bazaviy modelni cheklangan miqdorda qoldirishi mumkin.