AQSH «Binance»ning Eron bilan ehtimoliy aloqasini tekshirmoqda

AQSH Adliya vazirligi Eronning Amerika sanksiyalarini chetlab o‘tishda «Binance» kriptovalyuta platformasidan foydalangan bo‘lishi mumkinligi yuzasidan tekshiruv boshladi. Bu haqda «The Wall Street Journal» vaziyatdan xabardor manbalariga tayanib xabar berdi.

Milliard dollarlik shubhali tranzaksiya

Ma’lumotlarga ko‘ra, tekshiruv birja platformasi orqali amalga oshirilgan va Eron bilan bog‘liq deb taxmin qilinayotgan 1 milliard dollarlik operatsiyalar atrofida boshlangan. Ilgari kompaniya ushbu tranzaksiyalar bo‘yicha ichki surishtiruv o‘tkazgan, ammo keyinchalik uni to‘xtatgan.

Hozircha Adliya vazirligi tekshiruvi to‘g‘ridan-to‘g‘ri «Binance» faoliyatiga qaratilganmi yoki faqat uning ayrim mijozlari ishtirokidagi operatsiyalarni qamrab olganmi — bu masala aniq emas.

Ichki surishtiruv

Nashr manbalariga ko‘ra, idora vakillari Eron ishtirokida amalga oshirilgan bo‘lishi mumkin bo‘lgan tranzaksiyalar haqida ma’lumotga ega shaxslarni so‘roq qilmoqda.

Shu bilan birga, AQSH hukumati birjadan «Eron tranzaksiyalari»ga oid ma’lumotlarni taqdim etishni talab qilgan.

Nashr qayd etishicha, o‘tgan yil noyabr oyida o‘tkazilgan tekshiruv davomida xitoylik mijozlardan Eron foydalanadigan raqamli hamyonlarga 1,7 milliard dollar o‘tkazilgani aniqlangan. Ushbu mablag‘ning 1 milliard dollardan ortig‘i Gonkongda joylashgan «Blessed Trust» to‘lov kompaniyasi orqali o‘tgan.

Ushbu holat ortidan bir necha xodim «Binance» kompaniyasini tark etgan. Jurnalistlar bu ishdan bo‘shatish bilan bog‘liq bo‘lishi mumkinligini ta’kidlagan bo‘lsa, kompaniya vakillari xodimlar ishni o‘z xohishi bilan tark etganini bildirmoqda.

Kompaniyaning munosabati

Birja rasmiylari «Binance» sanksiya ostidagi tashkilotlar bilan hech qanday to‘g‘ridan-to‘g‘ri operatsiyalarga kirishmasligini ta’kidlamoqda.