АҚШ Исроилдан журналистларни Ғазога киритишни талаб қилмоқда — ОАВ
Вашингтон Ғазодаги оташкесимдан сўнг халқаро журналистлар учун кириш рухсатини сўраётгани хабар қилинди. Шу билан бирга, Трамп маъмурияти ҲАМАС аъзоларига тунеллардан хавфсиз чиқиш йўлини ҳам муҳокама қилмоқда.
АҚШ президенти Доналд Трамп маъмурияти Исроилдан Ғазо секторига чет эллик журналистларни киритишга рухсат беришни талаб қилмоқда. Бу ҳақда Исроил нашрлари Америка расмийларига таяниб хабар берди.
Нашр манбаларининг маълумотига кўра, Вашингтон бу масалани йил бошидан бери кўтариб келмоқда. Трамп август ойида чиқиш қилиб, хорижий журналистларнинг секторда ишлаш имконига эга бўлишини хоҳлашини айтган, бироқ вазиятнинг ҳали ҳам хавфли эканини тан олган эди.
Ҳозир Ғазонинг шарқий қисми Исроил қўшинлари томонидан назорат қилинаётган бир пайтда, Оқ уй журналистлар учун ерда ишлаш имконини яратиш зарурлигини яна таъкидламоқда.
Исроил Олий суди аввалроқ хорижий оммавий ахборот воситалари уюшмаси тақдим этган петиция асосида ҳукуматни 30 кун ичида ўз позициясини янгилашга мажбур қилган. Суд қарорда, оташкесим кучга кирганидан кейин вазият ўзгаргани ва илгариги хавф даражаси ҳақидаги далиллар қайта кўриб чиқилиши лозимлигини қайд этган.
Шу билан бирга, Исроилнинг 12-канали хабарига кўра, АҚШ Исроилга босим ўтказиб, тунелларда бўлган тахминан 200 нафар ҲАМАС аъзосига хавфсиз чиқиш йўлини беришни ҳам талаб қилмоқда. Ушбу вариант Трамп маъмуриятининг 20 бандини ўз ичига олган режаси доирасида кўриб чиқилмоқда. Режа тинчлик жараёнининг кейинги босқичига ўтишни назарда тутади.
Оташкесим даврида ҳам фаластинликлар орасида қурбонлар сони ошиб бормоқда. Ҳозирча 238 киши ҳалок бўлгани, 600 киши яралангани хабар қилинган. Шунингдек, қутқарувчилар аввалги авиаҳужумлардан сўнг вайрона остидан 510 та жасадни топган.
