АҚШ Россия нефти харидорларига 100 фоизлик бож жорий қилиши мумкин

АҚШ Сенатида Республикачи ва Демократик партия вакиллари Россия ва Эронга қарши янги санкциялар тўғрисидаги қонун лойиҳаси бўйича келишувга эришди.

«Bloomberg» маълумотига кўра, ҳужжат президент Доналд Трампга Россия энергия ресурсларининг энг йирик импортчиларига қарши қўшимча чекловлар жорий этиш имконини беради.

Қонун лойиҳасининг асосий муаллифларидан бири яқинда вафот этган республикачи сенатор Линдси Грэм бўлган.

Нашрнинг ёзишича, ҳужжат жорий ҳафтадаёқ Сенат томонидан маъқулланиши мумкин. Бироқ қонун дарҳол кучга кирмайди. Чунки Вакиллар палатаси август таътилига чиққан ва ҳужжат камида сентябргача қабул қилиниши кутилмоқда.

500 фоизлик бож

Қонун лойиҳаси президентга АҚШга импорт қилинадиган Россия товарларига 500 фоизлик, шунингдек, Россия энергия ресурсларининг бешта энг йирик импортчисига ҳамда Россия нефти ёки табиий газини сотиб олувчи ёхуд санкцияларни айланиб ўтишга ёрдам берувчи давлатларга нисбатан қўшимча 100 фоизлик бож жорий этиш ваколатини беради.

Якуний таҳрирда ушбу ваколатларнинг амал қилиш муддати беш йил билан чекланган.

Ҳужжат, шунингдек, 1996 йилда қабул қилинган Эронга қарши санкциялар тўғрисидаги қонуннинг амал қилиш муддатини 2031 йилгача узайтиришни назарда тутади. Шу билан бирга Эрон билан бизнес қилувчи хорижий компанияларга нисбатан иккиламчи санкцияларни ҳам ўз ичига олади.

Хитой ва Ҳиндистон

Янги санкциялар ташаббуси АҚШнинг Хитой ва Ҳиндистон билан савдо муносабатларига таъсир кўрсатиши мумкин. Бу икки давлат Россия энергия ресурсларининг энг йирик харидорлари ҳисобланади.

«Bloomberg» қайд этишича, айрим демократлар қонун лойиҳасини танқид қилмоқда. Улар президент Трамп ушбу ҳужжатдан кенг кўламли импорт божларини жорий этиш учун ҳуқуқий асос сифатида фойдаланишидан хавотир билдирмоқда.