АҚШ Венесуэлага тегишли миллионлаб долларлик нефтни мусодара қилади

АҚШ Венесуэлага тегишли навбатдаги йирик нефт юкини ҳам назоратига олади. Оқ уй ахборот котиби Каролайн Левиттнинг маълум қилишича, Венесуэла қирғоқларида тўхтатилган Skipper номли танкер АҚШ портига йўналтирилган ва ундаги нефт «қонун доирасида тўлиқ мусодара қилиниши» режалаштирилган. Нефтнинг бозор қиймати тахминан 60–100 млн долларни ташкил этади.

Reuters маълумотига кўра, Skipper танкери декабр бошида 1,8 млн баррел нефт юклаган ва тўхтатилишидан олдин 200 минг баррелни бошқа кемаларга ўтказган. АҚШ Адлия вазирлиги танкер Венесуэла ва Эрон нефтини санкцияларни бузган ҳолда ташишда айбланаётганини маълум қилди.

Вашингтон Венесуэлага нисбатан босимни кучайтирмоқда. Трамп маъмурияти сентябрдан бери мамлакат қирғоқлари яқинида махсус ҳарбий операциялар ўтказмоқда. Оқ уйга кўра, мақсад — «нётқилдирилган нефт савдоси ва наркотрафик»ни чеклаш. Операциялар жараёнида 87 нафар киши ҳалок бўлгани расман тасдиқланган.

Левиттнинг таъкидлашича, АҚШ «ўз орқа ҳовлисидаги хавфсизликка жиддий эътибор қаратмоқда» ва санкция қўлланган режимлар қора бозор нефт сотиб, молия тўплаш имкониятига эга бўлмаслиги керак. Унга кўра, танкерни мусодара қилиш жараёни суд қарорлари ва махсус тартиб асосида амалга оширилади.

Шу билан бирга, Вашингтон Венесуэла президенти Николас Мадуро атрофидаги шахсларга нисбатан янги санкциялар жорий қилди: Мадуронинг рафиқаси Силия Флореснинг уч жияни, бир тадбиркор ва мамлакат нефт соҳасидаги 6 та ташувчи компания рўйхатга киритилди. АҚШ Ғазначилиги уларни «алдамчи схемалар» ва «ноқонуний нефт айланмаси»да айбламоқда.