Banklarda har 100 million so‘mlik kreditning qariyb 4 million so‘mi muammoli
Iyul oyida jami muammoli kreditlar 23,9 trln so‘mga yetgan. Davlat ulushi mavjud banklar jami NPLning 70 foizdan ortig‘ini tashkil qilmoqda. NPL ulushi eng yuqori TBC bankda, eng yirik muammoli kredit portfeli esa O‘zmilliybankda qayd etilgan.
O‘zbekistonda tijorat banklarining 2026 yil 1-avgust holatiga ko‘ra kredit portfeli 644,6 trln so‘mga yetdi. Shundan 23,9 trln so‘m qaytishi muammoli bo‘lgan kreditlar — NPL hisobiga to‘g‘ri keladi.
Boshqacha aytganda, banklar mijozlarga bergan har 100 mln so‘m kreditning qariyb 3,7 mln so‘mi qaytishi muammoli bo‘lmoqda.
Ammo umumiy raqam banklar o‘rtasidagi vaziyatni to‘liq ko‘rsatmaydi. Ayrim banklarda NPLning mutlaq summasi katta bo‘lsa-da, ularning umumiy kredit portfeli ham juda katta.
Eng katta NPL ulushi qaysi banklarda shakllandi?
Muammoli kreditlarning mutlaq hajmi bo‘yicha birinchi o‘rinda O‘zmilliybank turibdi — 3,2 trln so‘m.
Undan keyingi o‘rinlarda Agrobank — 3,18 trln so‘m, Mikrokreditbank — 2,28 trln so‘m, O‘zsanoatqurilishbank — 1,91 trln so‘m va Asakabank — 1,78 trln so‘m joylashgan.
Biroq bu raqamlarni banklarning umumiy kredit portfeliga nisbatan tahlil qilinsa, ulushlar ancha kichik. Masalan, O‘zmilliybankning kreditlari 105,5 trln so‘m bo‘lsa, undagi NPL 3,2 trln so‘mni tashkil etadi. Natijada muammoli kreditlarning ulushi 3,03 foiz bo‘lgan.
Mikrokreditbankda esa vaziyat boshqacha: bankning jami kreditlari 23,1 trln so‘m, NPL esa 2,28 trln so‘m. Bu kredit portfelining 9,87 foizi muammoli ekanini anglatadi.
Ya’ni, NPL summasi bo‘yicha O‘zmilliybank oldinda, ammo kredit portfelining sifati bo‘yicha Mikrokreditbankning holati ancha og‘irroq.
NPL ulushi eng yuqori banklar
Kredit portfelining qanchalik katta qismi muammoli ekanini ko‘rsatadigan asosiy ko‘rsatkich — NPL ulushi.
Bank | Jami kredit | NPL | NPL ulushi |
TBC bank | 7,94 trln | 1,04 trln | 13,07% |
Poytaxt bank | 579,7 mlrd | 61,1 mlrd | 10,54% |
Mikrokreditbank | 23,12 trln | 2,28 trln | 9,87% |
Anor bank | 12,39 trln | 946,3 mlrd | 7,64% |
Garant bank | 1,62 trln | 115,5 mlrd | 7,15% |
AVO bank | 1,45 trln | 95,8 mlrd | 6,61% |
Biznesni rivojlantirish banki | 26,22 trln | 1,53 trln | 5,84% |
Madad Invest bank | 583,7 mlrd | 32,0 mlrd | 5,48% |
Ziraat Bank Uzbekistan | 2,45 trln | 117,6 mlrd | 4,81% |
Saderat bank | 8,7 mlrd | 406,6 mln | 4,69% |
TBC bankda har 100 so‘mlik kreditidan 13 so‘mdan ko‘prog‘i muammoli. Poytaxt bankda esa bu ko‘rsatkich 10,5 so‘m, Mikrokreditbankda 9,9 so‘m atrofida.
Davlat banklarida muammoli kreditlar ko‘proq
Bank tizimidagi muammoli kreditlarning katta qismi davlat ulushi mavjud banklarda to‘plangan.
Ularning jami kredit portfeli 421,9 trln so‘m, NPL hajmi esa 16,8 trln so‘mни tashkil etgan. Bu davlat ulushi mavjud banklar barcha kreditlarning 65,4 foizini berganini, ammo jami NPLning 70,2 foizi ham shu banklar hissasiga to‘g‘ri kelishini anglatadi.
Ushbu banklar guruhida NPL darajasi 3,98 foiz bo‘lgan. Qolgan banklarda esa bu ko‘rsatkich 3,20 foizни tashkil qilgan.
Qaysi banklarda muammoli kreditlar deyarli yo‘q?
KDB Bank O‘zbekiston va Oktobankda umuman NPL qayd etilmagan.
Apex bankda muammoli kreditlar ulushi atigi 0,055 foiz, Uzum bankda esa 0,009 foiz bo‘lgan.
Ya’ni bir bankda har 100 so‘mlik kreditning 13 so‘mdan ortig‘i muammoli bo‘lsa, boshqa banklarda bu ko‘rsatkich 0,01 so‘mga ham yetmaydi.
