Benzin narxi rekord darajada qimmatlashdi: AQSHda iste’molchilar kayfiyati tarixiy eng past nuqtaga tushdi
Bunga asosiy sabab sifatida Eron bilan bo‘layotgan urush va uning ortidan neft narxining 30 foizdan ko‘proqqa oshishi ko‘rsatilmoqda.
Bugun, 10-aprel kuni e’lon qilingan so‘rovnoma natijalariga ko‘ra, AQSHda iste’molchilar kayfiyati aprel oyi boshida rekord darajadagi past nuqtaga tushdi va iste’molchilar kelgusi 12 oy ichida inflatsiyaning keskin ko‘tarilishini kutishmoqda.
Michigan universitetining Iste’molchilar so‘rovnomasiga ko‘ra, Iste’molchilar kayfiyati indeksi shu oyda, mart oyidagi 53.3 yakuniy ko‘rsatkichidan rekord darajadagi 47.6 gacha tushib ketdi.
Asoslar
Kayfiyatning yomonlashishi barcha yosh, daromad va siyosiy qarashdagi guruhlarda kuzatildi. Biroq, so‘rovnomada qayd etilishicha, deyarli barcha javoblar shu hafta boshida AQSH-Isroil va Eron o‘rtasidagi urushda erishilgan otashkesim kelishuvidan oldin olingan.
«Reuters»ning yozishicha, urush neft narxining 30 foizdan ko‘proqqa oshishiga olib kelgan, benzinning milliy o‘rtacha chakana narxi esa oxirgi uch yil ichida birinchi marta bir gallon uchun 4 dollardan oshib ketgan.
«Ochiq sharhlar shuni ko‘rsatadiki, ko‘plab iste’molchilar iqtisodiyotdagi noqulay o‘zgarishlarda Eron bilan bog‘liq nizoni ayblamoqdalar», - dedi Iste’molchilar so‘rovnomasi direktori Joan Syu.
So‘rovnomaning kelgusi yil uchun inflatsiya kutilmalari shu oyda martdagi 3.8 foizdan 4.8 foizgacha ko‘tarildi. Iste’molchilarning kelgusi besh yil ichida inflatsiya bo‘yicha kutilmalari esa o‘tgan oydagi 3.2 foizdan 3.4 foizga oshdi.
