Биржа савдоларида суюлтирилган газни сотиш чекланади
1-августдан бошлаб биржа савдоларининг айрим бўлимларида суюлтирилган газни фақат лицензияга эга юридик шахслар харид қилиши мумкин бўлади.
© new.kaztag.kz18-июн куни Вазирлар Маҳкамасининг ёқилғи қуйиш шохобчаларида аварияларнинг олдини олиш ҳамда одамлар ҳаётига хавф туғдирувчи омилларни бартараф этишга қаратилган қарори қабул қилинганди.
Қарорга кўра, 1-августдан бошлаб биржа савдоларининг алоҳида секцияларида суюлтирилган газни фақат лицензияга эга юридик шахслар харид қилиши мумкин бўлади. Бунинг учун биржанинг онлайн ахборот тизими “Лицензия” платформаси билан интеграция қилинади.
Қарорда бензин ва суюлтирилган газ савдосини онлайн ҳисобга олиш тизимини жорий этиш ҳам назарда тутилган. Янги тизим орқали ёқилғи сотилиши ҳақидаги маълумотлар реал вақт режимида кузатиб борилади.
Шунингдек, ёқилғи қуйиш ускуналарига хизмат кўрсатувчи ходимларнинг малакасини назорат қилиш кучайтирилади. Сертификатсиз мутахассислар ишлаётган ёқилғи қуйиш шохобчалари 2027 йилдан бошлаб фаолият юрита олмайди.
Аввалроқ шу қарор билан 1-сентабргача хавфсизлик талабларини бузган ёқилғи қуйиш шохобчалари рўйхати шакллантирилиши ҳақида хабар берилганди. Улар босқичма-босқич хавфсиз ҳудудларга кўчирилиши режалаштирилган.
Эслатиб ўтамиз, Тошкент шаҳрида 22 июндан 15-сентабргача «ёнғинга қарши махсус режим» жорий этилган. Унга кўра, бозорлар, савдо мажмуалари ва бошқа умумий овқатланиш объектларида овқат тайёрлаш учун маиший газ баллонларидан фойдаланиш тақиқланади.
