«Биз тайёргарлик кўрмоқдамиз»: Куба президенти АҚШ билан эҳтимолий уруш ҳақида гапирди

Куба Америка Қўшма Штатлари билан эҳтимолий ҳарбий можародан қўрқмайди ва ўз суверенитетини ҳимоя қилишга тайёр, бироқ қарама-қаршиликнинг олдини олиш ҳамда Вашингтон билан мулоқот ўрнатишни устувор вазифа деб билади. Бу ҳақда Куба президенти Мигел Диас-Канел маълум қилди.

Гавана урушни хоҳламайди, аммо ғафлатда қолмаслик ва мағлубиятга учрамаслик учун тегишли тайёргарлик кўрмоқда. Бу ҳақда давлат раҳбари «Sky News» телеканалига берган интервюсида айтиб ўтди.

Таъкидланишича, АҚШ президенти Доналд Трампнинг Куба ҳақидаги баёнотлари ва Америка маъмуриятининг риторикаси Гавана томонидан жиддий қабул қилинаётган хавфли сигнал ҳисобланади.

Аввалроқ Доналд Трамп АҚШ Эронга ҳужумни якунлаганидан сўнг, Куба билан «шуғулланиши» режалаштирилганини айтган эди.

Музокаралар ва мудофаага ҳозирлик

Куба раҳбарининг айтишича, агар келишмовчиликлар таҳдидлар орқали эмас, балки музокаралар йўли билан ҳал қилинса, АҚШ ва Куба яхши қўшничилик муносабатларини олиб бориши ҳамда илм-фан, маданият, таълим ва иқтисодиёт соҳаларида ҳамкорлик қилиши мумкин.

Диас-Канелнинг билдиришича, эҳтимолий ҳужум содир бўлган тақдирда, мамлакат халқи бирдамлик ва қатъият билан жавоб қайтаради ҳамда ўз мустақиллигини сўнгги қон томчисигача ҳимоя қилади. Шунингдек, у қуролли можароларда технологиялар ва ҳарбий қудрат эмас, балки халқ иродаси ҳал қилувчи эканини таъкидлади.