Buyuk Britaniyada bolalarga ijtimoiy tarmoqlardan foydalanish taqiqlanadi

Buyuk Britaniyada 16 yoshga to‘lmagan bolalar uchun ijtimoiy tarmoqlarga kirish to‘liq taqiqlanadi. Mazkur qonun 2026 yil oxirigacha qabul qilinishi rejalashtirilmoqda, u kelgusi yilning bahoriga kelib kuchga kiradi. Bu haqda mamlakat bosh vaziri Kir Starmer ma’lum qildi.

Keyinroq Buyuk Britaniya hukumati «Snapchat» , «TikTok», «YouTube», «Instagram», «Facebook» va «X» tarmoqlari taqiq ostiga tushishiga aniqlik kiritdi. Hukumat bolalarning «WhatsApp» va «Signal» kabi messenjerlarga kirishini cheklashni rejalashtirmayapti. Shu bilan birga, hukumat turli platformalardagi «zararli funksiyalar»ni, jumladan, to‘g‘ridan-to‘g‘ri translyatsiyalar va 16 yoshga to‘lmagan bolalar bilan muloqot qilish imkoniyatini bloklashni rejalashtirmoqda.

Starmerning fikricha, ijtimoiy tarmoqlarni bolalar uchun xavfsiz muhit deb atab bo‘lmaydi, ular bolalarni baxtsiz qiladi. Bosh vazirning ta’kidlashicha, ijtimoiy tarmoqlar tahqirlashni osonlashtiradi va bolalar u yerda «ularning ruhiy salomatligiga salbiy ta’sir ko‘rsatishi mumkin bo‘lgan xavfli kontent» bilan to‘qnashadi. U, shuningdek, ijtimoiy tarmoqlar qaramlikni keltirib chiqaradigan tarzda yaratilganini qo‘shimcha qildi.

AQSHning eng yirik texnologik kompaniyalari tomonidan salbiy munosabat kutyaptimi, degan savolga Starmer taqiq uning texnologiyalar va sun’iy intellektga qarshi chiqayotganini anglatmasligini aytdi.

«Sun’iy intellekt va texnologiyalarning kelajagi uchun bolalarimizni himoyasiz qoldirishimiz kerak, degan vajga hech qachon rozi bo‘lmayman», - dedi bosh vazir.

Taqiqlar

Bolalar va o‘smirlarning ijtimoiy tarmoqlarga kirishini taqiqlagan dunyodagi birinchi mamlakat Avstraliya bo‘ldi. Bunday taqiq 2025 yil dekabr oyida kuchga kirdi. Qonunni bajarmaslik uchun javobgarlik ijtimoiy tarmoq egalari zimmasiga yuklatiladi. Agar ular kirishni bloklash uchun zarur choralarni ko‘rmasa, ularni 49,5 million Avstraliya dollarigacha (33 million AQSH dollari) jarima kutadi. Bunday choralar qatoriga 16 yoshga to‘lmagan bolalarning akkauntlarini faolsizlantirish va shu yoshdagi yangi foydalanuvchilarni ro‘yxatdan o‘tkazishni taqiqlash kiradi.