Chevrolet Damas’нинг янги моделлари тақдим этилди

UzAuto Motors икки янги тижорат автомобили — Chevrolet Damas Max ва Chevrolet Damas Move моделларини бозорга чиқараётганини маълум қилди. Янги моделлар тадбиркорлар ҳамда оилавий мижозлар эҳтиёжларини инобатга олган ҳолда ишлаб чиқилган бўлиб, кенг сиғим, юқори самарадорлик ва ҳамёнбоп нарх ўртасидаги мувозанатни таклиф этади.

Қайд этилишича, Chevrolet Damas Move йўловчи ташишга мўлжалланган бўлиб, сиғими етти нафар йўловчини ташкил этади. Ушбу моделни ҳам оилавий саёҳатлар, ҳам тадбиркорлик фаолияти учун мос бўлади.

Автомобил учун икки хил атмосферaли двигател таклиф этилмоқда: 1,2 литрли, 81 от кучига эга агрегат беш поғонали механик узатмалар қутиси билан ҳамда 1,5 литрли, 103 от кучига эга двигател эса олти поғонали механик узатмалар қутиси билан жиҳозланган.

Chevrolet Damas Max эса юк ташишга йўналтирилган бўлиб, 650 килограммгача юк кўтариш имкониятига эга. Юкхона ҳажми 3 куб метрдан ортиқ бўлади. Базавий жиҳозланишда хавфсизлик ёстиқчалари, ABS ва EBD тизимлари, марказий қулф ҳамда масофадан бошқариладиган калит мавжуд.

Янги моделлар учун тавсия этилган чакана нархлар 134 миллион сўмдан 154 миллион сўмгача бўлиб, комплектация ва двигател турига қараб фарқ қилади. Сотувлар бошланиш санаси қўшимча равишда эълон қилиниши маълум қилинди.

Эслатиб ўтамиз, аввалроқ UzAuto Motors янгиланган Chevrolet Traverse моделини тақдим этгани ҳақида хабар бергандик.