Доллар уч йилдан бери илк марта 11 800 сўмдан пастга тушди
Сўмга нисбатан доллар курси кетма-кет тўртинчи иш куни пасайди. Сўнгги тўрт иш кунида курс 143,01 сўмга, йилнинг илк иш кунидан бери эса 1,7 фоизга қадрсизланди. 20 августдан амал қиладиган янги расмий курс — 11 794,88 сўм. Бу 2023 йил 10 августидан бери энг паст кўрсаткич
19 август куни валюта биржасидаги савдолар якунида доллар курси 25,52 сўмга ёки 0,22 фоизга пасайди. Марказий банк 20 августдан амал қиладиган янги расмий курсни 11 794,88 сўм этиб белгилади.
Бу доллар курсининг 2023 йил 10 августидан бери илк марта 11 800 сўмдан пастга тушишидир. Ўша куни расмий курс 11 667 сўм эди. 11 августда эса курс бирданига 408,03 сўмга ошиб, 12 075,03 сўмга етган. Шундан кейин 20 августга қадар доллар курси 11 800 сўмдан пастламаган.
Доллар сўнгги тўрт иш кунида кетма-кет арзонлади. 14 августда 11 937,89 сўм бўлган расмий курс 143,01 сўмга ёки 1,2 фоизга пасайди.
Жорий йилнинг илк иш куни — 5 январда расмий курс 12 004,41 сўмни ташкил этган. Шундан бери доллар 209,53 сўмга ёки 1,7 фоизга қадрсизланди.
Доллар курси Ўзбекистонда қандай шаклланади?
Ўзбекистонда расмий доллар курси Республика валюта биржасидаги савдолар асосида белгиланади. Банклар бу ерда хорижий валютани сотиб олади ва сотади, курс эса талаб ва таклиф мувозанатига қараб шаклланади.
Импорт тўловлари ва ташқи қарзлар бўйича талабнинг ортиши долларни қимматлаштириши мумкин. Экспорт тушумлари, пул ўтказмалари ва аҳоли томонидан банкларга валюта сотилишининг кўпайиши эса бозордаги таклифни оширади.
Сўм нега мустаҳкамланмоқда?
Марказий банк доллар курсининг сўнгги кунлардаги кетма-кет пасайишига айнан нима сабаб бўлганини изоҳламади. Бироқ йилнинг биринчи ярмидаги рақамлар бозорда валюта таклифи талабга қараганда тезроқ ўсганини кўрсатмоқда.
Январ—июн ойларида хорижий валютага бўлган умумий талаб 20 фоизга ошиб, қарийб 32 млрд долларни ташкил этди. Марказий банк операцияларини ҳисобга олмаганда, валюта таклифи эса 31 фоизга кўпайиб, 27,8 млрд долларга етди.
Аҳоли ярим йилда банкларга 12,3 млрд доллар эквивалентидаги хорижий валютани сотиб, 6,8 млрд долларлик валюта харид қилди. Натижада жисмоний шахсларнинг ижобий валюта сальдоси 5,5 млрд долларни ташкил этди. Халқаро пул ўтказмалари орқали мамлакатга келиб тушган маблағ ҳам 9,3 млрд долларга етди.
Бу омиллар ички бозорда валюта таклифини кўпайтириб, сўмнинг мустаҳкамланишига ёрдам бераётган бўлиши мумкин. Бироқ жорий пасайишни фақат аҳоли кўпроқ валюта сотаётгани билан изоҳлаш тўғри бўлмайди.
Курснинг кейинги йўналиши импорт талаби, экспорт тушумлари, пул ўтказмалари ва Марказий банк операцияларининг қандай ўзгаришига боғлиқ бўлади.
