Эрон АҚШ билан келишув имзоланадиган санани маълум қилди
Масъуд Пизишкиён уруш пайтида мамлакатда ички барқарорлик сақлаб қолинганини таъкидлади.
Эрон президенти Масъуд Пизишкиён Теҳрон ва Вашингтон ўртасидаги можарога барҳам беришга қаратилган келишув 19 июн куни имзоланишини маълум қилди.
Эроннинг IRNA давлат агентлиги хабарига кўра, давлат раҳбари ушбу баёнотни Ички ишлар вазирлигида бўлиб ўтган учрашув чоғида берган.
«Ўзаро ҳаракатлар мувофиқлаштирилгани натижасида Эрон ва АҚШ ўртасидаги келишув баённомаси жума куни имзоланади», — деди Пизишкиён.
Президент, шунингдек, можаро даврида мамлакатда ички барқарорликни сақлаб қолишга эришилганини, давлат идоралари эса ўз вазифаларини самарали бажаришда давом этганини таъкидлаган.
Аввалроқ Покистон бош вазири Шаҳбоз Шариф бир қатор жадал музокаралардан сўнг Вашингтон ва Теҳрон ўртасида келишувга эришилганини маълум қилган эди.
Ўз навбатида, Эрон ташқи ишлар вазири ўринбосари Казем Ғарибободий келишувга эришилганини тасдиқлаб, ўзаро англашув меморандуми 19 июн куни Швейцарияда имзоланишини билдирган.
АҚШ президенти Доналд Трамп ҳам келишув устидаги ишлар якунланганини эълон қилиб, Ҳўрмуз бўғози очилиши ва Американинг денгиз қамали бекор қилинишини маълум қилган эди.
