Фарғонада кадастр агентлиги ходими пора билан қўлга олинди
У фуқародан ўзбошимчалик билан эгаллаб олинган ерда қурилиш қилгани учун жарима солмаслик эвазига пора қилган.
Фарғона вилоятида давлат хизматчилари иштирокида икки йирик коррупсион ҳолат аниқланди. Бу ҳақда ДХХ ахборот хизмати хабар берди.
Риштон туманида кадастр агентлиги бўлими бош инспектори фуқаролардан ноқонуний пул талаб қилгани учун ДХХ ва ҳуқуқ-тартибот идоралари томонидан қўлга олинган.
Маълумотларга кўра, инспектор фуқаронинг яшаш ҳудудида қўшимча ер майдони ўзбошимчалик билан эгаллангани ва қурилиш қилингани учун 84 миллион сўм жарима солинишини айтган.
Шундан сўнг у фуқарога жарима қўлламаслик ва ерни қонунийлаштириб бериш эвазига 400 АҚШ доллари талаб қилган. Ўтказилган тезкор тадбир чоғида инспектор хизмат биноси олдида пулни қабул қилиб олган вақтда ашёвий далиллар билан ушланган.
Яна бир ҳолатда эса қурилиш фаолияти билан шуғулланувчи хусусий корхона 2025 йилнинг октябрь ойида “Фарғона сув қурилиш инвест” давлат муассасасининг маъмурий биносида 850 млн сўмлик мукаммал таъмирлаш ишларини амалга ошириш учун ўтказилган шаффоф тендер танловида ғолиб чиқади. Бироқ, ушбу давлат муассасаси бош муҳандиси ва бошқалар ўзаро тил бириктириб, хусусий корхонада мукаммал таъмирлаш ишларини бошлаш учун рухсат бериш эвазига хусусий корхона раҳбаридан 5500 АҚШ доллари талаб қилишади. Ўтказилган тезкор тадбир натижасида юқоридаги шахслар 5 минг АҚШ долларини олган вақтларида қўлга олинган.
Айни пайтда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
