Германияда оммавий фирибгарлик: Банк ҳисобларидан яширинча 99 евро ечиб олинмоқда
Кибержиноятчилар Европанинг автоматик тўлов тизимидаги нозик нуқтани топишди. Улар ҳеч қандай рухсатсиз мижозларнинг карталаридан пул ўғирламоқда.
© gettyimages.com«Bild» нашрининг хабар беришича, кибержиноятчилар Германия фуқароларининг банк ҳисобларидан билдирмасдан пул ўғирлашнинг янги ва самарали усулини ўйлаб топишди. Маблағлар ҳисоб эгасининг ҳеч қандай тасдиғисиз, тўғридан тўғри сохта компаниялар фойдасига ечиб олинмоқда.
Тармоқларда ҳисобидан кутилмаганда роппа-роса 99 евро ғойиб бўлаётганидан шикоят қилувчи фойдаланувчилар сони кескин ортиб бормоқда. Пулни қабул қилиб олувчилар сифатида Болгарияда рўйхатдан ўтган «Lunero EOOD» ва «Lenoxal Limited EOOD» каби номаълум компаниялар кўрсатилмоқда.
Ўғирлик қандай ишлайди?
Жиноятчилар тўғридан тўғри дебетлаш механизмидан фойдаланмоқда. Бу — компанияларга мунтазам хизматлар ёки обуналар учун мижоз ҳисобидан автоматик равишда пул ечиб олиш имконини берувчи функция.
Асосий муаммо шундаки, банклар кўпинча мижоз ҳақиқатан ҳам маблағ ечиб олишга рухсат берган ёки йўқлигини текширмайди. Фирибгарларга фақат ҳисоб рақами (IBAN) ва жабрланувчининг исми керак бўлади.
Бу маълумотларни улар одатда глобал маълумотлар сизиб чиқиши орқали қўлга киритади ёки даркнетдаги хуфиёна форумлардан сотиб олади.
Нега айнан 99 евро?
Бу схема бозор учун янгилик эмас. Феврал ойида ҳам «Megatipp Emergency Call Services» номли ташкилот фойдасига оммавий пул ечиш ҳолатлари кузатилган эди. Жиноятчилар атайлаб 99 евро каби миқдорни танлашади, чунки улар бундай тўлов кундалик маиший харажатлар орасида билиниб қолмаслигига ва эгасининг дарҳол эътиборини тортмаслигига умид қилишади.
Пулни қайтариш мумкинми?
Мутахассислар банк кўчирмаларини доимий ва диққат билан текшириб боришни маслаҳат бермоқда. Агар мижоз номаълум тўловни аниқласа:
Транзакцияни бекор қилиш талаби билан дарҳол ўз банкига мурожаат қилиши керак.
Стандарт қоидаларга кўра, рухсат этилган тўлов бўйича 8 ҳафта ичида низолашиш мумкин. Бироқ, мижознинг розилигисиз ноқонуний пул ечиб олинган ҳолларда, бу муддат қонунчиликка кўра 13 ойгача узайтирилади.
Шунингдек, бундай қайтаришлар фирибгарларнинг ўзига ҳам молиявий зарар келтиради: ҳар бир мажбурий пул қайтариш учун банк улардан қўшимча жарима комиссиясини ундиради.
