Gigantlar, birjalar va davlatlar: BTCning asosiy hajmlari kimning qo‘lida?
«Arkham Intelligence» blokcheyn platformasi ekspertlari eng yirik bitkoin egalari o‘rtasida BTC taqsimoti bo‘yicha tadqiqot e’lon qildi. Unda aktivlar xususiy shaxslar, kompaniyalar, birjalar va davlat tuzilmalari qo‘lida qanday jamlangani baholangan.
Eng yirik bitkoin egasi kim?
«Arkham» ma’lumotlariga ko‘ra, bitkoinning eng yirik egasi hali ham birinchi kriptovalyuta yaratuvchisi bo‘lgan anonim shaxs Satosi Nakamoto hisoblanadi. Tahlilchilar bahosiga ko‘ra, u bilan bog‘liq hamyonlarda taxminan 1,1 mln BTC saqlanadi, bu esa uni eng yirik individual egaga aylantiradi.
Ommaviy ravishda aniqlangan hamyonlar orasida esa «Binance» kriptobirjasining «sovuq» hamyoni yetakchilik qilmoqda, unda taxminan 250 000 BTC mavjud.
Umuman olganda, eng yirik manzillar orasidagi dastlabki to‘rt o‘rin markazlashgan birjalarga tegishli. Beshinchi o‘rinni 2016 yilda «Bitfinex» birjasi buzib kirilganidan keyin musodara qilingan va hozir AQSH hukumatining nazoratida bo‘lgan bitkoinlar saqlanadigan manzil egallaydi.
Oltinchi o‘rin esa USDT steyblkoini emitenti bo‘lgan «Tether» kompaniyasi zaxiralarini boshqaradigan hamyonga tegishli.
Platformalar
Tuzilmalar segmentida eng yirik korporativ bitkoin egasi «Coinbase» platformasi bo‘lib, uning hamyonlarida 993 000 BTC mavjud. Keyingi o‘rinlarda investitsiya giganti «BlackRock» (761 000 BTC), «Strategy» kompaniyasi (714 000 BTCdan), «Binance» birjasi (taxminan 661 000 BTC) va «Fidelity Investments» (448 000 BTC) joylashgan.
Davlatlar
Davlatlar orasida eng yirik tasdiqlangan egalar quyidagilar:
AQSH — 328 000 BTC
Buyuk Britaniya — 61 000 BTC
Salvador — 7 500 BTC
Birlashgan Arab Amirliklari — 6 800 BTC
Butan Qirolligi — 5 600 BTC
Rossiya — 1 000 BTC
«Arkham» ma’lumotlariga ko‘ra, davlat zaxiralarining bir qismi bitkoinda ochilmagan holda qolishi mumkin, chunki hamma hamyonlar rasman tasdiqlanmagan.
Anonim hamyonlar ko‘p
Shuningdek, milliardlab dollarlik aktivlarga ega ko‘plab anonim hamyonlar mavjud bo‘lib, ularning aksariyat qismi uzoq vaqt mobaynida faol emas. Bu esa ularning uzoq muddatli saqlash strategiyasini ko‘rsatishi mumkin.
Tahlilchilar shuni ta’kidlayaptiki, bitkoinning ayrim egalarida jamlanishi yuqori darajada saqlanib qolmoqda. Institutsional ishtirok ortib bormoqda, bu bozor strukturasini o‘zgartiryapti, oldingi sikllarda asosan xususiy investorlar ustunlik qilgan edi.
2026 yilga kelib BTC taqsimoti katta fondlar va investitsiya tuzilmalari tarafga harakat qilmoqda, shu bilan birga chakana egalik hissasi sekin-asta kamayapti. Mutaxassislar fikricha, bu bozorning volatilligi va dinamikasiga ta’sir ko‘rsatishi mumkin.
