Googleʼдан қўрққулик: OpenAI ChatGPTни сақлаб қолиш учун айрим лойиҳаларни тўхтатмоқда
Сэм Алтман OpenAIда «қизил код» режимига ўтди: компания барча ресурсларни ChatGPTни яхшилашга йўналтириб, бошқа йирик лойиҳаларни вақтинча тўхтатмоқда. Асосий хатар — Google рақобати.
OpenAI раҳбари Сэм Алтман ички жамоага мурожаат қилиб, компанияда «қизил код» режими жорий этилганини маълум қилди. Бу қарор компаниянинг байроқдор маҳсулоти — ChatGPTнинг рақобатбардошлигини сақлаб қолиш учун барча инсон ва технологик ресурсларни максимал даражада сафарбар этишни назарда тутади.
The Wall Street Journal нашри хабарига кўра, компания ўзининг қатор стратегик лойиҳаларини тўхтатиб, фойдаланувчилар учун чат-бот тажрибасини кескин яхшилашга киришган.
Алтман жамоага юборган қайдномасида асосий вазифаларни белгилади: персонализацияни ошириш, тезлик ва ишончлиликни яхшилаш, ChatGPT жавоб бериши мумкин бўлган саволлар диапазонини кенгайтириш. Бу режани амалга ошириш учун реклама платформаси, тиббиёт ва савдо учун СИ-агентлар, шунингдек Pulse номли шахсий ёрдамчи ишланмаси вақтинча тўхтатилди. Бошқа гуруҳлар ҳам ChatGPTни «қутқариш»га йўналтирилди ва ҳар кунлик назорат йиғилишлари жорий этилди.
OpenAIдаги хавотирнинг асосий сабаби — Googleнинг тез суръатда олдинга силжиши бўлмоқда. Компания Gemini моделининг янгиланган версиясини ишга тушириб, бир қатор соҳавий тестларда OpenAI ишланмаларидан илғорроқ натижаларни кўрсатди. Шу билан бирга, Gemini ойлик фаол аудиторияси июлдаги 450 млндан октябрда 650 млнгача ўсди. Googleнинг Nano Banana генератори ҳам маҳсулотлар оммалашувини тезлаштирди. Бундан ташқари, бизнес-клиентлар орасида оммалашиб бораётган Anthropic ҳам рақобат босимини кучайтирмоқда.
OpenAIнинг молиявий ҳолати ҳам вазиятни мураккаблаштирар экан, компания 2030 йилгача даромадлиликка чиқиш учун ҳажмни 200 млрд доллар даражасигача ошириши кераклиги қайд этилмоқда. Googleдан фарқли ўлароқ, OpenAI ўзини ўзи таъминлай олмайди ва доимий инвестицияларга муҳтож. Шу билан бирга, август ойида чиқарилган GPT-5 модели «совуқ» услуби ва оддий масалалардаги хато жавоблари учун танқид остига олинган.
Шунга қарамай, компания муҳим устунликка эга: ChatGPT ҳафтасига 800 млндан ортиқ фаол фойдаланувчига эга. Алтманнинг айтишича, келгуси ҳафта тақдим этиладиган янги «фикрлаш модели» Googleнинг энг сўнгги ишланмаларидан ҳам устун келади.
