Илон Маск 700 млрд долларлик бойлиги бор биринчи одамга айланди
Tesla компаниясидаги тўлов пакети ва акциялар қиймати ўсиши ортидан Маскнинг бойлиги тарихий рекордни яна янгилади.
Tesla компаниясига оид йирик тўлов пакети бўйича суд қарори ортидан миллиардер Илон Маск дунё тарихида илк бор 700 миллиард доллардан ошиқ соф бойликка эга шахсга айланди. Forbes миллиардерлар индексига кўра, 20 декабр куни Маскнинг умумий бойлиги 749 миллиард долларга етган.
Бу ўзгариш Делавэр штати Олий суди томонидан 2018 йилда Tesla раҳбари учун тасдиқланган, аммо кейинчалик бекор қилинган акциялар опционлари қайта тикланганидан сўнг рўй берди. Гап қиймати 139 миллиард долларга баҳоланган тўлов пакети ҳақида бормоқда. Аввалроқ қуйи суд ушбу компенсация шартномасини «асоссиз ва тушуниш қийин» деб топиб, бекор қилган эди.
Олий суд эса 2024 йилда қабул қилинган қарор Маскка нисбатан ноҳақ ва адолатсиз бўлганини таъкидлаб, тўлов пакетини тиклашга қарор қилди. Натижада Tesla акциялари қиймати ошди ва Маскнинг шахсий капитали кескин кўтарилди. Ушбу пакет 56 миллиард долларлик маош схемаси асосида шаклланган бўлиб, тарихдаги энг йирик корпоратив рағбатлантириш битимларидан бири ҳисобланади.
Бундан олдин, ҳафта бошида Маск ўзининг аэрокосмик стартапи SpaceX’ни оммавий савдога чиқариши мумкинлиги ҳақидаги хабарлар ортидан 600 миллиард доллардан ортиқ бойликка эга бўлган биринчи инсон сифатида қайд этилган эди. Бу омил ҳам инвесторлар ишончини янада мустаҳкамлади.
Ноябрь ойида Tesla акциядорлари Маск учун қиймати 1 триллион долларгача баҳоланаётган янги маош режасини маъқуллади. Инвесторлар унинг компанияни сунъий интеллект ва робототехника соҳасида глобал етакчига айлантириш стратегиясини қўллаб-қувватлаётганини билдирди.
Forbes маълумотларига кўра, Маскнинг ҳозирги бойлиги дунёнинг иккинчи энг бой инсонларидан бири — Ларри Пейж капиталига нисбатан қарийб 500 миллиард долларга кўп. Бу ҳолат глобал бизнес ва технология соҳасидаги кучлар нисбатида янги босқич бошланганини кўрсатмоқда.
