Илон Маск Европа Иттифоқини тарқатиб юбориш кераклигини таъкидлади
Илон Маск Еврокомиссиянинг X (собиқ Twitter) платформасига 120 млн евролик жаримасидан сўнг Евроиттифоқни «тугатиш» ва суверенитетни миллий ҳукуматларга қайтариш кераклигини айтиб, бюрократия «Европани ўлдирмоқда», дея танқид қилди.
SpaceX ва Tesla асосчиси, жаҳоннинг энг бадавлат инсони Илон Маск Европада кескин баёнотлари билан яна муҳокама марказига айланди. Еврокомиссия томонидан X платформасига нисбатан 120 млн евролик жарима қўлланилганидан бир неча соат ўтиб, Маск Евроиттифоқни бутунлай «бекор қилиш» зарурлигини ёзиб чиқди. Унинг фикрича, суверенитет аъзо давлатларга қайтарилса, ҳукуматлар ўз халқлари манфаатини «анча яхшироқ» ҳимоя қила олади.
Маск постида Европадаги бюрократик жараёнларни «секин, лекин аник ўлимга олиб бораётган тизим» сифатида таърифлади. Ундан сўнг тадбиркор саҳифасида «AbolishTheEU» — «ЕИни тугатинг» ҳэштеги билан яна қатор танқидий постлар пайдо бўлди.
Унинг бу гапини Венгрия бош вазири Виктор Орбан қўллади. Россия собиқ президенти Дмитрий Медведев ҳам «айнан шундай қилиш керак», деб ёзди. Полша ташқи ишлар вазири радослав Сикроский эса «Марсга учиб бор-да, ўша ерда билган ишингни қил», деб ёзди.
Танқидга Telegram асосчиси Павел Дуров ҳам қўшилди. У Евроиттифоқни «технокомпанияларни сукутда цензурага мажбур қиладиган бажариб бўлмайдиган қоидалар» жорий этишда айблади. Дуровнинг фикрича, Евроиттифоқнинг ҳозирги ёндашуви Европа технология сектори рақобатбардошлигига жиддий хавф солади.
Еврокомиссиянинг жазоси Европада 2024 йилдан кучга кирган Digital Services Act — рақамли хизматлар тўғрисидаги қонун асосида эълон қилинган биринчи йирик жарима ҳисобланади. Регулятор Xʼни бир нечта қоидаларни бузганликда айбламоқда:
пулли «кўк галочка» орқали фойдаланувчиларни адаштирганлик;
мустақил тадқиқотчиларга зарур маълумотларни тақдим этмаганлик;
реклама тизимининг шаффоф эмаслиги.
Европа мансабдорлари эса позициясида қатъий: янги қонун платформаларни шаффофликка, хавфли контентни чеклашга ва истеъмолчилар ҳуқуқини ҳимоя қилишга мажбур қилади. Хусусан, ЕКда Xʼнинг «жамоат хавфсизлигига оид» талабларга жавоб бермаётгани таъкидланади.
