Ислом тараққиёт банки Ўзбекистон инфратузилмаси ва таълимига 164 млн доллар ажратади
Ислом тараққиёт банки Ўзбекистон билан йўл инфратузилмаси ва таълим соҳасини қамраб олган йирик молиялаштириш битимларини имзолаб, ҳамкорликни янги босқичга олиб чиқмоқда.
Ислом тараққиёт банки (IsDB) ва Ўзбекистон Республикаси ўртасида инфратузилма ва таълим соҳаларини ривожлантиришга қаратилган икки йирик молиялаштириш битими имзоланди. Ҳужжатлар Саудия Арабистонининг Ал-Ула шаҳрида ўтаётган шаклланаётган бозорлар иқтисодиёти бўйича иккинчи конференция доирасида расмийлаштирилди.
Битимларни IsDB президенти Муҳаммад Ал-Жассир ва Ўзбекистон Республикаси Бош вазир ўринбосари, иқтисодиёт ва молия вазири Жамшид Қўчқоров имзолашди. Томонлар имзолаш маросимидан олдин икки томонлама музокаралар ўтказиб, шерикликни кенгайтириш ва юқори ижтимоий-иқтисодий самарага эга лойиҳаларни тезлаштириш масалаларини муҳокама қилди.
Муҳокамаларда Ўзбекистоннинг миллий тараққиёт устувор йўналишларига мос келувчи инфратузилма ва инсон капиталига сармояларни оширишга алоҳида эътибор қаратилди.
Йўл инфратузилмаси лойиҳаси
Биринчи келишувга мувофиқ, IsDB 4R40 Даштобод–Зомин–Бахмал–Ғаллаорол автомобил йўлини реконструкция қилиш лойиҳаси учун 70 млн доллар ажратади. Ушбу маблағ банкнинг умумий 192 млн долларлик мажбурияти доирасида тақдим этилмоқда.
Лойиҳа доирасида Жиззах вилоятидаги 143 км ҳудудий автомобил йўли, шунингдек, 30 км маҳаллий ва қишлоқ йўллари таъмирланади. Бу тахминан 200 минг нафар аҳоли учун ҳаракат хавфсизлигини ошириш, транспорт «тирбандликлари»ни бартараф этиш ва бозорлар ҳамда ижтимоий хизматларга чиқиш имкониятларини яхшилашни кўзда тутади.
Янгиланган йўл М39 халқаро транспорт йўлагига чиқишни енгиллаштириб, ҳудуднинг иқтисодий ва туристик салоҳиятини ошириши кутилмоқда.
Таълимга сармоя
Иккинчи битим SmartEd таълим лойиҳаси доирасида 94,06 млн доллар молиялаштиришни назарда тутади. Бу IsDBнинг ушбу ташаббусга йўналтирилган умумий 160,25 млн долларлик ҳиссасининг бир қисми ҳисобланади.
Лойиҳа доирасида республика бўйлаб 58 та янги таълим муассасаси қурилади, амалдаги мактаблар базасида эса 2431 та замонавий ўқув синфи ташкил этилади. SmartEd инклюзив, компетенцияга йўналтирилган таълим тизимини шакллантиришга қаратилган.
Лойиҳа ҳар йили 72 минг 930 нафар ўқувчини қамраб олиши, шунингдек, 36 минг 115 нафар педагог ва маъмурий ходимнинг малакасини оширишни таъминлаши кутилмоқда.
IsDB президенти Муҳаммад Ал-Жассир банк Ўзбекистонни натижага йўналтирилган ҳамкорлик орқали қўллаб-қувватлашда давом этишини таъкидлади. Жамшид Қўчқоров эса транспорт боғлиқлиги ва инсон капиталига сармоялар барқарор иқтисодий ўсишнинг асосий омиллари эканини қайд этди.
