Жаҳон банки урушдан жабрланган давлатларга молиявий ёрдам маблағини ажратади

Жаҳон банки Яқин Шарқдаги урушдан жабрланган мамлакатларни қўллаб-қувватлаш учун 80 миллиарддан 100 миллиард долларгача маблағ ажратишни режалаштирмоқда. Бу ҳақда банк президенти Ажай Бангага таяниб Reuters маълум қилди.

Маблағлар босқичма-босқич ажратилади

Унинг сўзларига кўра, ушбу маблағлар келгуси 15 ой давомида босқичма-босқич тақдим этилади. Илк босқичда 20–25 миллиард доллар инқирозга қарши чоралар доирасида ажратилиб, мамлакатларга мавжуд лойиҳалар бўйича маблағларни муддатидан олдин олиш имконияти яратилади.

Қолган 30–40 миллиард доллар эса тахминан олти ой ичида амалдаги дастурларни қайта кўриб чиқиш ва қайта тақсимлаш орқали йўналтирилади. Бу механизм давлатларнинг тезкор молиявий эҳтиёжларини қондиришга хизмат қилади.

Урушнинг жаҳон иқтисодиётига таъсири

Мутахассислар таъкидлашича, уруш аллақачон жаҳон иқтисодиётига жиддий таъсир кўрсатмоқда. Хусусан, инфляция босими кучаймоқда ва иқтисодий ўсиш суръатлари секинлашмоқда. Айниқса, ривожланаётган давлатлар бу жараёндан энг кўп зарар кўриши мумкин.

Бангага кўра, агар можаро узоқ давом этса, Жаҳон банки қўшимча молиялаштириш манбаларини излашга мажбур бўлади. Бу эса умумий ёрдам ҳажмини янада ошириши мумкин.

13-апрел куни Банга Халқаро энергетика агентлиги раҳбари ва Халқаро валюта жамғармаси раҳбари Кристалина Георгиева билан учрашди. Улар энергетика бозорининг барқарорлашиши учун вақт кераклигини таъкидлади.

«Агар можаро яқин ҳафталарда тугаса, жаҳон иқтисодиёти Яқин Шарқдаги уруш зарбасидан тезда тиклана олади, аммо вазият ёзгача чўзилса, аҳвол ёмонлашади», деди Георгиева.

Халқаро валюта жамғармаси ҳам энергия нархлари ўсиши ва таъминот занжирларидаги узилишлардан жабрланган мамлакатлар билан музокаралар олиб бормоқда. Мутахассислар ҳукуматларни кенг кўламли субсидиялардан воз кечиб, мақсадли ва вақтинчалик чоралар кўришга чақирмоқда.