Кўп қаватли бинолар «Шаффоф қурилиш» тизимидаги рейтингига қараб фойдаланишга топширилади
Президент фармонига кўра, 2026 йилдан бошлаб қурилишда сейсмик хавфсизликни таъминлаш, текширувлар шаффофлигини ошириш ва ноқонуний қурилишларга чек қўйиш бўйича қатор мажбурий механизмлар жорий этилади.
Ўзбекистонда бинолар ва иншоотларнинг зилзилабардошлиги ҳамда сейсмик хавфсизлигини таъминлаш бўйича давлат назорати янги босқичга чиқмоқда. Президентнинг 2025 йил 1 декабрда қабул қилинган PF–236-сон фармони соҳадаги назорат ва бошқарувни янада такомиллаштиришга қаратилди.
Ҳужжатга мувофиқ, биринчи навбатда ноқонуний қурилишларни барвақт аниқлаш ва уларни тезкор бартараф этиш механизмлари кучайтирилади. Шу билан бирга, қурилиш-пудрат ташкилотларининг объектларда зилзилабардошлик талабларига риоя қилиш бўйича жавобгарлиги оширилади.
2026 йил 1 январдан бошлаб икки ва ундан юқори қаватли уй-жойларни техник жиҳатдан ўрганишга ихтисослашган лойиҳа ташкилотларининг ягона рўйхати шакллантирилади. Уларнинг фаолияти «Шаффоф қурилиш» миллий ахборот тизими орқали рейтинги асосида баҳолаб борилади. Шу тизимда инструментал-техник текширув натижалари асосида объектларнинг реал техник ҳолати мониторинг қилинади. Энг муҳими, бундай текширув хулосаларининг тавсиявий характери бекор қилинади ва кўп қаватли уй-жойлардан фойдаланишга рухсат фақат ижобий хулоса мавжуд бўлганда берилади.
Фармонга кўра, миллий меъёрларга мос келмайдиган қисмлар учун махсус техник шартлар асосида ишлаб чиқилган лойиҳа ҳужжатларини экспертизадан ўтказиш ваколати фақат «Шаҳарсозлик ҳужжатларини экспертиза қилиш республика маркази»га бириктирилади. Зилзилабардошлик бўйича экспертиза хулосаларини тавсиявий мазмунда бериш амалиёти ҳам тугатилади. Бундан буён салбий хулоса олинган тақдирда, лойиҳа ташкилотининг «Шаффоф қурилиш» тизимидаги рейтинги камайтирилади.
Шунингдек, қурилиши бошланган кўп қаватли уй-жойларга қўшимча қават қўшиш ёки баландлигини ошириш учун лойиҳа ҳужжатларини қайта ишлаш ва экспертизадан ўтказиш тақиқланади. Ноқонуний қурилмаларни бузиш бўйича харажатлар ҳар йили Қурилиш ва уй-жой коммунал хўжалиги вазирлиги томонидан алоҳида тартибда белгиланади. Ушбу қоидалар муассасаларнинг масъулиятини ошириш, аҳоли хавфсизлигини таъминлаш ва қурилиш соҳасида ижро интизомини мустаҳкамлашга қаратилган.
