Mahalla binolarida FVV inspektorlari uchun xizmat xonalari tashkil etiladi
O‘zbekistonda mahallalar xavfsizligini kuchaytirish maqsadida FVV inspektorlari uchun maxsus xizmat xonalari tashkil etish bo‘yicha yangi tizim joriy etilmoqda.
2026 yil 31-mart kuni O‘zbekiston Favqulodda vaziyatlar vaziri Aziz Ikromov va O‘zbekiston Mahallalari uyushmasi raisi Qahramon Quronboyev ishtirokida o‘zaro hamkorlik to‘g‘risida memorandum imzolandi.
Hujjatga ko‘ra, endilikda mahalla binolarida Favqulodda vaziyatlar vazirligi inspektorlari uchun alohida xizmat xonalari tashkil etiladi. Bu tashabbus aholiga yaqinlashgan holda xavfsizlik nazoratini kuchaytirishga xizmat qiladi.
Tashabbusning asosiy maqsadi
Ma’lum qilinishicha, mazkur hamkorlikning asosiy maqsadi — mahallalarda favqulodda vaziyatlarning oldini barvaqt olish va ularning oqibatlarini kamaytirishdir. Shuningdek, profilaktik ishlar mahallabay va xonadonbay yondashuv asosida tashkil etiladi.
«Mahalla muhofazasi» xizmat xonalari
Prezidentning 2025 yil 20-oktabrdagi farmonida ham, aholi o‘rtasida xavfsizlik madaniyatini oshirishga alohida e’tibor qaratiladi. Shu doirada «Mahalla muhofazasi» xizmat xonalarini tashkil etish ham muhim vazifalardan biri sifatida belgilangan.
Shuningdek, uchrashuv davomida davlat nazorati inspektorlarining «Mahalla yettiligi» bilan hamkorligini kuchaytirish, shuningdek, «Favqulodda vaziyatlar volontyori» jamoatchilik guruhlarini shakllantirish masalalari muhokama qilindi.
Bundan tashqari, mahallalarda aholi orasidan ko‘ngillilar guruhini shakllantirish, ularni qutqaruv ishlariga tayyorlash va zarur jihozlar bilan ta’minlash choralari ham belgilangan.
Qayd etilishicha, mazkur memorandum aholi va hududlarni favqulodda vaziyatlardan ishonchli himoya qilish tizimini yanada mustahkamlashga xizmat qiladi.
