Маск 1 трлн долларлик режа рад этилса, Tesla’ни тарк этиши мумкин
Tesla бошқарув кенгаши Маскни лавозимида олиб қолиш учун акциядорларни 1 трлн долларлик мукофот режасига овоз беришга чақирди.
Tesla директорлар кенгаши раиси Робин Денхолм акциядорларни агар бош директор Илон Маскка деярли 1 триллион долларлик мукофот пакетини тақдим этишни қўллаб-қувватламасалар, Маск компанияни тарк этиши мумкинлигидан огоҳлантирди. Бу ҳақда у 6 ноябрга белгиланган йиллик йиғилиш олдидан акциядорларга йўллаган мактубида ёзган, деб хабар бермоқда CNBC.
«Илонсиз Tesla катта қийматини йўқотиши мумкин, чунки компаниямизни биз интилаётган мақсадларимизга қараб баҳоламай қўйишлари мумкин», - деди Денхолм.
Маск учун мўлжалланган 1 трлн долларлик акциялар режаси 5 ноябргача акциядорлар томонидан маъқулланиши керак. Бироқ бу таклифга қаршилар ҳам бор. Дунёдаги энг йирик консалтинг фирмаси Institutional Shareholder Services уни «астрономик сумма» деб баҳолаб, овоз бермасликни тавсия этган. Шунингдек, бир гуруҳ касаба уюшмалари ва корпоратив кузатувчилар Маскнинг сиёсий фаоллиги Tesla брендига зарар етказиши мумкинлигини таъкидлаб, қаршилик кампаниясини бошлаган.
Денхолм бу масала фақат молиявий мукофот ҳақида эмас, балки компаниядаги таъсир ва бошқарув ҳақида эканини айтди. Унинг фикрича, Маск сунъий интеллект соҳасида хавфли йўналишларни чеклаш учун етарли назоратга эга бўлишни хоҳлайди. Бу режа тасдиқланса, Маскнинг компаниядаги улуши 25 фоизга етади.
Акциядорларнинг бир қисми мукофот пакетига қарши чиқиб, Маскни ўз лавозимида сақлаб қолиш учун директорлар кенгашининг «тинимсиз ҳаракати»ни танқид қилмоқда. Уларнинг фикрича, бу асосий мақсадларга эришишни секинлаштиради, Tesla'нинг операцион ва молиявий кўрсаткичларига салбий таъсир кўрсатади ҳамда реал вақт режимида раҳбарият фаолиятини назорат қилишни чеклайди.
Tesla эса бу танқидларга жавобан, Маскнинг мукофоти тўғридан-тўғри компания қийматининг ўсишига боғланганини билдирди. “Агар у натижага эришмаса, ҳеч нарса олмайди”, - дейилган компания баёнотида.
Сентябр ойида директорлар кенгаши Маскка кейинги ўн йил давомида маош ва мукофотлар тўламасликни, акцияларни фақат компания маълум мақсадларга эришганда, жумладан, капиталлашувни камида 8,5 триллион долларгача ошириш ва фойдани кўпайтириш шарти билан беришни таклиф қилди. Мукофот пакетининг потенциал қиймати тахминан 1 триллион долларга баҳоланмоқда.
