Meta kompaniyasi Facebook, Instagram va WhatsApp uchun pullik obunalarni ishga tushirdi: Ular nima beradi?

Xo‘sh, ushbu obunalar necha pul turadi va ular oddiy foydalanuvchilar, blogerlar hamda biznes uchun qanday eksklyuziv imkoniyatlarni taqdim etadi? Tafsilotlar maqolada.

Obunalar narxi qancha va ular nima uchun kerak bo‘ldi?

Kompaniya sun’iy intellekt va ma’lumotlar markazlarini qurish uchun 2026 yilda 145 milliard dollargacha kapital investitsiya kiritishni rejalashtirgan. Ushbu ulkan xarajatlarni moliyalashtirish maqsadida Meta allaqachon xodimlarining 10 foizini qisqartirdi va yangi pullik obunalarni ishga tushirdi. Yangi tariflar quyidagicha narxlanadi:

· Facebook Plus va Instagram Plus: Oyiga $3,99.

· WhatsApp Plus: Oyiga $2,99.

· Meta AI pullik tariflari: Bazaviy paket uchun oyiga $7,99 va premium paket uchun $19,99.

Yangiliklar e’lon qilingach, investorlarning xavotirlariga qaramay, Meta aksiyalari 3,7 foizga ko‘tarildi.

Facebook va Instagram Plus qanday imkoniyatlarni beradi?

Pullik obuna egalari ijtimoiy tarmoqlarda bir qator eksklyuziv funksiyalardan foydalanish huquqiga ega bo‘lishadi:

· Stories (Hikoyalar) uchun kengaytirilgan imkoniyatlar: Hikoyalarni standart 24 soatdan ko‘proq muddatga saqlab qo‘yish, ularni qayta ko‘rganlar sonini kuzatish va e’lon qilishdan oldin oldindan ko‘rib chiqish (preview) funksiyasi paydo bo‘ladi.

· Auditoriyani boshqarish: “Yaqin do‘stlar” ro‘yxatidan tashqari cheklanmagan miqdorda maxsus auditoriya ro‘yxatlarini tuzish va yangi postlarni obunachilar tasmasida (lenta) ko‘rsatmasdan, faqat profilning o‘zida e’lon qilish mumkin bo‘ladi.

· Vizual yangilanishlar: Stories uchun animirilgan «super-yuraklar» reaksiyalari, profil tavsifi uchun maxsus shriftlar va ilova uchun kastom belgilar (ikonkalar) taqdim etiladi.

 WhatsApp Plus va Meta AI tariflaridagi o‘zgarishlar

Messenjer foydalanuvchilari uchun WhatsApp Plus kastom ringtonlar, ilovaning yangi mavzulari, ko‘proq chatlarni yuqoriga mahkamlash (pin qilish) imkoniyati va kengaytirilgan stikerlar to‘plamini taklif etadi.

O‘z navbatida, Meta AI chat-botining bepul talqini saqlanib qolgan holda, pullik tarif egalari uchun mulohaza yuritish rejimi (Thinking Mode) limitlari oshiriladi hamda video va tasvirlarni yuqori sifatda generatsiya qilish imkoniyati ochiladi. Qayd etish joizki, reklamadan tashqari obunalar va pullik xabarlardan keladigan daromadlar allaqachon Meta uchun yuzlab million dollar qo‘shimcha foyda keltirmoqda.