Миср қироличасининг 673 та бриллиант ўрнатилган тақинчоғи ўғирланди

Венада икки нафар эркак Амалий санъат музейидан 673 та бриллиант ўрнатилган кольени ўғирлади. Бу ҳақда «Vol.at» нашри хабар берди.

Номаълум шахслар 27-август куни соат тахминан 14:00 да тақинчоқлар кўргазмасига оддий ташриф буюрувчилар сифатида бориб, музейга кирган. Улар «Van Cleef & Arpels» мода уйига тегишли кўргазмада намойиш этилган, тақинчоқ сақланаётган шиша витринани синдириб, кольени олиб кетишган.

Полиция маълумотларига кўра, шундан сўнг улар номаълум йўналишда қочиб кетган. Маҳаллий полиция ҳодиса юзасидан тергов олиб бормоқда.

Колье Миср қироллик оиласи учун махсус тайёрланган бўлиб, аввал Миср қироличаси Назли Сабрига тегишли бўлган. У 1939-йилда «Van Cleef & Arpels» заргарлик уйига ушбу кольени буюртма қилган. Қиролича уни қизининг Эрон тахт вориси, кейинчалик эса Эрон шоҳи бўлган Муҳаммад Ризо Паҳлавий билан тўйида тақишни режалаштирган. Колье платина ва умумий оғирлиги 217 карат бўлган бриллиантлардан тайёрланган.

1950-йилларда Назлининг ўғли, қирол Форуқ, уни унвонларидан маҳрум қилган. У АҚШга кўчиб ўтиб, христианликни қабул қилган ва Мария-Елизавета исмини олган. 1975-йилда молиявий муаммолар туфайли у ўз кольесини «Sotheby's» аукционига қўйган. У ерда тақинчоқ 140 минг долларга хусусий коллекционерга сотилган.

Яна 40 йил ўтиб, 2015-йилда ушбу тақинчоқ қайта аукцион савдоларига қўйилган. Иккинчи марта уни кольени тайёрлаган «Van Cleef & Arpels» заргарлик уйи сотиб олган. Ўша пайтда унинг қиймати 4,3 миллион долларга баҳоланган.