Можтабо Хоманаий нега отасининг дафн маросимида иштирок этмади
Манбаларга кўра, Эрон олий раҳнамосининг оммага кўринмаслиги хавфсизлик чоралари билан боғлиқ бўлиши мумкин.
© KollajЭрон олий раҳнамоси Можтабо Хоманаий отаси — марҳум Оятуллоҳ Али Хоманаий билан видолашув маросимларида иштирок этмади. Бу ҳақда The New York Times манбаларга таяниб хабар берди.
Али Хоманаий учун жаноза намози 5 июль куни Теҳронда ўқилиши кутилмоқда. Видолашув тадбирлари эса Эроннинг бешта шаҳрида ўтказилиб, 9 июлгача давом этади.
Шу вақтга қадар марҳум раҳнамонинг ўғли ва Эроннинг амалдаги олий раҳнамоси Можтабо Хоманаий омма олдида кўриниш бермаган.
Али Хоманаийнинг дафн маросимини ташкил этиш қўмитаси раҳбари Акбар Пуржамшидиён аввалроқ Можтабо Хоманаийнинг маросимдаги иштироки бўйича қарорни унинг ўзи қабул қилишини билдирган. Шунга қарамай, Хоманаий тарафдорлари уни видолашув тадбирларида кўришни кутган.
Бироқ Эрон Ислом инқилоби қўриқчилари корпусидаги икки манбанинг айтишича, хавфсизлик билан боғлиқ хавотирлар унинг маросимга келиш эҳтимолини камайтирган. Уларнинг таъкидлашича, Исроил томонидан унинг жойлашувини аниқлаш ёки унга қарши эҳтимолий ҳужум уюштириш хавфи ҳисобга олинган.
Манбаларга кўра, Можтабо Хоманаий дафн маросимининг айрим қисмларида қатнашиш истагини билдирган. Хусусан, у 9 июль куни Машҳад шаҳридаги Имом Ризо зиёратгоҳида ўтказилиши режалаштирилган маросимда иштирок этиб, отаси хотирасига дуо ўқишни хоҳлаган.
Эслатиб ўтамиз, Али Хоманаий билан видолашув маросимлари 3 июль куни Теҳронда бошланган. Унда Ўзбекистон номидан Қонунчилик палатаси спикери Нуриддин Исмоилов бошчилигидаги делегация иштирок этган.
АҚШ ва Исроил томонидан 28 февраль куни Эронга уюштирилган авиаҳужумларда Али Хоманаий ҳалок бўлгани айтилган. Унинг ўлими 1 март куни расман тасдиқланган ва мамлакатда 40 кунлик мотам эълон қилинган.
Дастлаб видолашув маросимлари март ойида ўтказилиши режалаштирилган эди. Бироқ кўп сонли иштирокчилар келиши кутилгани ва зарур инфратузилмани тайёрлаш сабабли тадбирлар июль ойига қолдирилган.
Можтабо Хоманаий эса 9 март куни Эроннинг янги олий раҳнамоси этиб сайланган. Хабарларга кўра, у ҳужумларда олган жароҳатлари сабаб шу кунгача жамоатчилик олдида чиқиш қилмаган. Унинг мурожаатлари телевидение орқали ўқиб эшиттирилган ёки ёзма шаклда эълон қилинган.
